Sekrete dhe spekullime në periudhën e komunizmit; një rast i sjellë nga studiuesja Albana Rexhepaj

“Mapo” boton sot një përmbledhje të studiueses Albana Rexhepaj, prezantuar në Seminarin XXXIII Ndërkombëtar për Gjuhën, Letërsinë dhe Kulturën Shqiptare, që u mbajt në Prishtinë javën e shkuar.  Në workshop-in me tematikë: “Shqiptarët në komunizëm”, Rexhepaj shkruan për “Sekretet në komunizëm” dhe për këtë Rexhepaj u referohet edhe dy ngjarjeve, thuajse të njëkohshme: vdekjes në vitin 1972 të 27 foshnjave në maternitetin e Tiranës dhe infarktit të Enver Hoxhës, po atë vit. Të dyja ngjarje që u mbajtën sekret dhe që për këtë arsye nxitën thashetheme në kryeqytet. “Analiza ime e merr fillesën e saj në këtë ngjarje dhe me ndihmën e saj synon të hedhë dritë mbi arsyet se përse një ngjarje e përmasave të tilla u mbajt sekret”, është shprehur Rexhepaj. Cili ishte spekulimi që nxiti mbajtja sekret e këtyre ngjarjeve. Ja sesi e përcjell “Mapo” këtë analizë të studiueses: “Të dyja ngjarjet u mbajtën sekret, dhe aty ku ka sekrete ka edhe spekulime. Ndoshta ishin vetë prindërit e foshnjave të vdekura ata që të parët bënë lidhjen mes të dy ngjarjeve dhe shumë filluan të besonin se bebet u vranë, në mënyrë që diktatori të merrte gjakun e tyre”. Më tej diçka edhe nga zbulimi i këtij fakti, që riprodhon spekullime, pikërisht për shkak të mbajtjes sekret: “Historia e ’72-it mbeti në fakt e varrosur ashtu si fëmijët në varret e Sharrës, derikur Rexhepaj e zbuloi atë po prej atje, rastësisht në fund të viteve ‘80. “Pas një funerali, rruga nëpër varreza na çoi përpara një parcele të braktisur, që nuk mund të të linte indiferent. “Këto janë varret e bebeve të maternitetit, mbi 60 bebe, mbase 100 vdiqën atëherë. U tha, nga një sëmundje, por ca thanë që i vranë”, më tha ime më gati duke pëshpëritur, edhe pse ishim vetëm, dhe duke shtuar, që ajo vetë nuk i besonte kësaj”, – rrëfen Rexhepaj. Ajo thotë se në fakt nuk e ka verifikuar dot nëse varret në Sharrë i përkasin pikërisht këtij rasti, ndërsa shton se drejt studimit e ka shtyrë kurioziteti për të mësuar se çfarë kishte ndodhur vërtet dhe njëkohësisht “për të kuptuar sistemin ku u linda dhe u rrita, ku u hodhën themelet e mia si individ dhe jo më së paku për të kuptuar veten time dhe atë të njeriut shqiptar e se si funksiononim në komunizëm”, shkruan “Mapo”.

http://mapo.al/2014/08/dosje-sekretet-e-komunizmit-vdekja-e-bebeve-1972/