Samaras i kërkon ndërhyrjen personale Ramës për çështjen e Himarës, Çamërisë dhe kufirin detar

Në Uells, në kuadër të Samitit të NATO-s, kryeministri Rama ka takuar homologun e tij grek, Samaras. Por duket se në njoftimin për shtyp të zyrës së kryeministrit nuk janë thënë të gjitha ku nënvizohet vetëm se në takim u fol për projektet me rëndësi rajonale në fushën e infrastrukturës dhe të energjisë. Por mediat greke kanë folur më gjatë për këtë takim. Gjatë bisedës, që zgjati rreth 30 minuta, mësohet se Samaras ka kërkuar ndërhyrjen personale të Ramës “për trajtimin e çështjeve që u ngritën në zonën e Himarës pas reformës administrative”. Sipas agjensisë së lajmeve AMNA, Samaras ka kërkuar një qëndrim ndaj “trumbetave nacionaliste të çamëve”. Kryeministri grek i ka kujtuar homologut shqiptar se respektimi i të drejtave të njeriut është pjesë e procesit të anëtarësimit të Shqipërisë në BE. Sipas medieve greke mësohet se, pjesë e rëndësishme e takimit ka qenë edhe marrëveshja e anuluar nga ana e gjykatës kushtetuese të Shqipërisë për kufirin detar, ku Samaras ka përsëritur qëndrimin e palës greke se duhet të zgjidhet mbi bazën e të drejtës ndërkombëtare. Nga ana e tij, kryeministri shqiptar Edi Rama, ka falënderuar kryeministrin Samaras për mbështetjen e sinqertë të Greqisë ndaj Shqipërisë, ndërsa ka theksuar se e njeh ndjeshmërinë e kryeministrit grek për çështjen e minoritetit. Rama u shpreh se respektimi i të Drejtave të Njeriut, ka qenë prioritar dhe se nuk ka ekzistuar asnjë qëllim që të dëmtohet minoriteti grek. Ekstremizmi fetar në rajon ka qenë një temë tjetër e diskutimit mes dy krerëve të qeverive. Duke iu referuar rreziqeve të rajonit nga ky fenomen, Rama nënvizoi vijimin e bashkëpunimit mes dy policive në përballimin e krimit.

L.V

http://top-channel.tv/new/lajme/artikull.php?id=283732