Salman Rushdie: Prej Vargjeve Satanike janë fyer ata që s’e kanë lexuar librin; dhe fanatikët

“Një biografi e Joseph Antonit” është titulli i librit më të fundit të Salman Rushdie-së. Kjo biografi është autobiografi, që do të thotë se Joseph Anton është Salman Rushdie d.v. (ka bërë tok emrat e dy shkrimtarëve që atij i pëlqejnë, Çehovit dhe Konradit). Për këtë libër flet edhe për Top-channel-in, në një intervistë interesante të bërë nga Rudina Xhunga. Një nga pyetjet më inteligjente të Xhungës është ajo që ka lidhje me fatwa-n e shpallur më 14 shkurt të vitit 1989: A nuk ju duket sikur kjo fatwa s’ka lidhje me ju, por me Joseph Antonin?

Përgjigja e tij është pa asnjë ndërdyshje: “Jo, më ndodhi mua. Në njërën anë, [fatwa] ndihet ende shumë e pranishme në jetën time, sepse kishte pasoja shumë ekstreme për një kohë të gjatë të jetës sime… Mendoj se mënyra se si është shkruar ky libër, është mënyra se si unë e lë më në fund pas atë histori. E kam ditur gjithnjë që kam dashur ta shkruaj këtë libër. E dija që kisha një histori për të treguar. E dija që një ditë do ta shkruaja. Pasi e bën, ndien sikur ke hequr një barrë.”

Pyetjes vijuese: A mund të thonit sot se me Vargjet Satanike nuk donit të provokonit askënd?, shkrimtari indiano-britanik i përgjigjet: “Provokimi dhe fyerja është diçka që bëhet shumë lehtë. Po të dua të të fyej, mund ta bëj shumë shpejt. S’kam nevojë për pesë vjet punë. Ka shumë myslimanë që e kanë lexuar ‘Vargjet Satanike’ dhe mendojnë se është shumë i mirë dhe s’e kanë fare problem. Një numër shumë i madh njerëzish që thonë se janë të fyer prej tij, s’i kanë lexuar asnjë fjali. Problemi s’është me romanin, por me fanatizmin. Një gjë për të cilën jam përpjekur shumë gjatë viteve që njerëzit ta kuptojnë, është të mos fajësojnë viktimën. Ai që ka përgjegjësi për krimin është krimineli. Nëse unë të fyej ty, dhe të them diçka që është shumë fyese, ti më urren për këtë dhe merr një armë e më qëllon. Është faji yt, jo i imi. Njerëzit e dhunës janë fajtorë për veprimet e dhunshme. Jo ata që bien pre e këtyre veprimeve. Fatkeqësisht, jetojmë në një kohë kur retorika e fesë, dhe sidomos e asaj ekstreme, është aq e fuqishme, sa përpiqet ta heqë peshën e fajit. Thotë ‘ai njeri më fyeu, kështu që jam i shfajësuar për ta sulmuar’. Jo, nuk është [kështu].”

Intervistën e plotë të Salman Rushdie-së mund ta ndiqni në linkun: http://www.gazetatema.net/web/2012/10/01/intervista-flet-shk...

E.G.