Sa u detyrohen shqiptarëve pasardhësit e Mbretit Zog?

Në një koment te Shqiptarja.com, Idajet Beqiri akuzon pasardhësin e Leka Zogut se po uzurpon pasuritë e popullit në emër të mbretërisë. Beqiri konsideron se Leka Zogu II ka “marrë krahë nga pushteti që i ka dhënë në Presidencë z. Bujar Nishani, Presidenti i Republikës, është vërsulur si lubi mbi pasurinë kombëtare, mbi sakrificat, djersën dhe gjakun e shqiptarëve. Pasi përvetësoi më rrugë të kundraligjëshme Pallatin  ePionierëve të kryeqytetit, pasi përvetësoi po në rrugë të kundraligjëshme edhe Pallatin e ‘Mbretit’ në Durrës, tashmë që ‘u vesh’ me pushtet presidencial, i ka paraqitur Gjykatës së Rrethit Gjyqësor Tiranë një padi, me anë të së cilës kërkon t’u vjedhë sërish shqiptarëve Pallatin e Brigadave dhe pasuri të tjera kombëtare...”

Akuza e Beqirit bazohet te argumenti që pasuritë e Zogut, njësoj si ato të Enverit, ishin thjesht në përdorim. Në këtë logjikë, i bie që edhe të bijtë e Enverit të kërkojnë vilën ku banonin, madje edhe ish-Komitetin Qendror duke e lënë dhe pa zyra Kryesinë e sotme të Kuvendit. Por, argumenton Beqiri, edhe sikur t’i kishin të tyret, sipas Kodit Civil shqiptar duhet të analizohen e vlerësohen të tëra pasuritë e Zogut, nga ato duhen zbritur detyrimet që u ka shqiptarëve bazuar mbi detyrimet që rëndojnë mbi të tëra pasuritë trashëgimnore. Dhe, llogarit Beqiri, pasardhësit duhet t’i kthejnë shqiptarëve 11 valixhet me 178 kg ar që ish-Mbreti mori nga Banka e Shqipërisë, kur la vendin më 1939.

k.c.