Sa fitojnë konkretisht? 2.9 milionë lekë në ditë

Sa fitojnë realisht nga rrogat, qiratë dhe aktivitete të tjera fëmijët e kryeministrit të Shqipërisë? Në kakofoninë e zërave që krijohet rëndom pas çdo denoncimi në Shqipëri, është e vështirë që qytetari të përqëndrohet. Megjithatë, me pak fjalë ajo që po ndodh është kjo: Prej disa ditësh, opozita me gojën e deputetit Taulant Balla po “lexon” deklaratat e pasurisë së Berishës dhe fëmijëve të tij. Veçanërisht këto të fundit janë mbresëlënëse. Në një vit të vetëm, të dy bashkë, Argita dhe Shkëlzeni kanë fituar 1 miliard e 34 milionë lekë. Nëse këto fitime të deklaruara do të pjesëtoheshin me ditët e vitit (madje duke konsideruar që punojnë edhe të shtunë-të dielë), rezulton se dy fëmijët e kryeministrit të Shqipërisë fitojnë 2.9 milionë lekë në ditë, një shifër kjo që (mënjanë retorika politike) është sensacionale për Shqipërinë.

Vetë fëmijët e kryeministrit Berisha dhe bashkëshorti i Argita Malltezit, Jamarbër Malltezi në një deklaratë shpërndarë për mediat thonë se “të ardhurat tona janë të gjitha nga burime të ligjshme dhe të deklaruara në organet përkatëse. Sa më sipër vërtetohet lehtësisht nga deklarimet vjetore të pasurisë në ILDKP, institucion i cili hetoi dhe konstatoi vërtetësinë e deklarimit tonë të pasurisë ndër vite, por dhe deklarimet pranë organeve tatimore mbi të ardhurat personale vjetore. I kujtojmë zotit Balla, - thuhet në deklaratën e tyre, - se të ardhurat tona janë në dritë të diellit; ndryshe nga shefi i zotit Balla, i cili pasi betonoi Tiranën me miliona metër katrorë ndërtim dhe u akuzua publikisht nga ndërtuesit se u kish kërkuar miliona euro në shkëmbim të lejeve të ndërtimit, deklaron si kursime jete 3 mijë euro dhe se jeton 6 muaj te shokët e 6 muaj tek mami meqë është i pastrehë”. Më pas, vijnë fjalitë e pritshme me paralajmërime për… gjyq. (A.N.)