Sa duhet të ndryshojë vota e koalicioneve, që të ndryshojë raporti aktual i mandateve?

Në emisionin e mbrëmshëm Opinion të Fevziut, Eduard Zaloshnja dhe Artan Hoxha analizuan se sa duhet të ndryshojë vota e koalicioneve në krahasim me 2009-ën, që të ndryshojë raporti aktual i mandateve parlamentare ndërmjet tyre. Dje ata analizuan qarqet Berat, Dibër, Durrës, Elbasan, Fier dhe Gjirokastër. Të hënën do të analizojnë 6 qarqet e tjera.

Tri ishin koalicionet që u analizuan: Koalicioni i udhëhequr nga PD-ja, koalicioni i udhëhequr nga PS-ja dhe koalicioni i udhëhequr nga LSI-ja (i cili aktualisht ka në përbërje, gjysmë zyrtarisht, vetëm partinë e Dules dhe të Karamelos). Koalicioni Poli i Lirisë është shpërbërë, ngaqë dy partitë kryesore të tij, PDK dhe LZHK, i janë bashkuar koalicionit të PD-së. Ndërsa partitë e reja, meqë nuk kanë patur vota në 2009-ën, nuk u analizuan.

Nga analiza rezultoi se në qarkun e Beratit duhet vetëm një lëvizje fare e vogël votash nga LSI-ja te PS-ja (vetëm 13), ose nga PD-ja te PS-ja (vetëm 105), që kjo e fundit të marrë mandatin e 5-të në këtë qark. Në qarkun e Fierit, një lëvizje prej vetëm 1000 votash (nga rreth 180 mijë që ishin gjithsej) mund të sjellë ndryshim të raportit të mandateve mes dy koalicioneve të mëdha. Ndërsa LSI-ja mund ta humbasë mandatin në qark, vetëm në qoftë se i pakësohen mbi 1200 vota, krahasuar me 2009-ën.

Në qarkun e Durrsit, një lëvizje prej 3500 votash nga djathtas majtas mund të sjellë ndryshim të raportit të mandateve mes dy koalicioneve të mëdha. Ndërsa LSI-ja mund ta humbasë mandatin në qark, vetëm në qoftë se i pakësohen mbi 1100 vota, krahasuar me 2009-ën. Në qarqet e Dibrës dhe të Gjirokastrës duhet një lëvizje mbi 5500 vota që raporti të ndryshojë në favor të koalicionit të PS-së, ndërsa koalicioni i LSI-së është shumë larg marrjes së një mandati në këto qarqe.

Re.Pu.