Rasti "Mema" lëviz organizatat ndërkombëtare të medias. Solidaritet i ulët kolegësh në Tiranë

Organizata e Mediave të Europës Juglindore, SEEMO, dënoi policinë kufitare greke për ndalimin e hyrjes së gazetarit shqiptar Marin Mema. Në një deklaratë nga Viena organizata thotë se gazetari shqiptar Marin Mema i televizionit Top Channel po shkonte për një vizitë private në Greqi, kur policët e ndaluan të hynte, duke iu referuar një raportimi të tij një viti me parë. SEEMO, (Organizata e Gazetarëve të Europës Juglindore) u kërkoi autoriteteve greke të shpjegojnë shkaqet e vërteta të këtij ndalimi dhe u kujtoi atyre se reporterët lejohen të udhëtojnë kudo edhe si qytetarë të thjeshtë edhe si gazetarë.
Sekretari i përgjithshëm i kësaj organizate të gazetarëve, Oliver Vujoviç, theksoi në deklaratë se policia kufitare greke ka shkelur në këtë rast disa standarte ndërkombëtare mbi lëvizjen e lirë të gazetarëve, dhe se shtypi i lirë nuk mund të ndalohet nga kufijtë e shteteve. “Greqia është një vend i Bashkimit Europian, - citohet Vujoviç nga Zëri i Amerikës, -, dhe këto veprime të policisë kufitare greke duhen hetuar dhe shpjeguar edhe nga Këshilli i Europës dhe nga OSBE”.
Protesta për rastin e Memës ka patur edhe nga Unioni i Gazetarëve të Shqipërisë, i cili organizoi sot një tubim përpara ambasadës së Greqisë në Tiranë, ku siç shihet nga fotot e agjensisë LSA, pjesëmarja ka qenë e ulët. Solidariteti mes kolegësh në median shqiptare në raste të tilla ka qenë përgjithësisht në nivele të ulëta.