Rama drejt Beogradit për samitin Kinë-Ballkan. Li Keqiang: Nuk e harrojmë ndihmën shqiptare

Nesër kryeministri Edi Rama viziton sërish Serbinë, këtë herë për samitin Kinë-Ballkan që do të zhvillohet me përfaqësues të 16 vendeve të Evropës Lindore dhe Qendrore, në Beograd. Samiti do të ketë në krye të agjendës së tij, ekonominë dhe zhvillimin e marrëdhënieve ekonomike mes Kinës dhe rajonit të Ballkanit. Kreu i qeverisë shqiptare do të shoqërohet nga dy ministra, ai i Ekonomisë Arben Ahmetaj dhe ai i Transportit, Edmond Haxhinasto. Për të garantuar sigurinë e liderëve do të angazhohen rreth 10 mijë policë, përfshirë dhe snajper në çatitë e ndërtesave. Ndërkohë për herë të parë, Serbia do të ketë edhe njësinë e saj speciale Antidron, duke marrë shkas nga ngjarjet e ndodhura në stadiumin e Beogradit në ndeshjen Serbi-Shqipëri.

Nga ana e tij, kryemysafiri, kreu i qeverisë kineze Li Keqiang nuk ka ngurruar të evokojë miqësinë e vjetër me Shqipërinë dhe ndihmën e Tiranës zyrtare dikur. “Miqtë janë si vera. Sa më e vjetër, aq më e mirë. Sot, shumë njerëz në Kinë kujtojnë ende kontributin historik të Shqipërisë në vendosjen e të drejtave të ligjshme të Kinës në Kombet e Bashkuara në vitin 1971”, tha

Li Keqiang në prag të takimit. Po ashtu, ai e cilësoi bashkëpunimin me Shqipërinë një miqësi të thellë tradicionale dhe të shëndoshë. 

a.k