Rajerson pyetet për Berishën dhe një kabllogram të Uikiliks për arrestimin e Fatos Nanos

Në intervistën e gazetares Ilva Tare me tre ambasadorët amerikanë këtë mbrëmje ka patur edhe një segment ku Rajerson është pyetur për Berishën dhe një kabllogram publikuar nga Uikiliks ku thuhet se Nano i ishte ankuar ambasadores Lino se SHBA kishte rol në arrestimin e tij. Pyet Tare, Rajersonin:

Si e keni njohur kryemistrin e tanishëm Berisha dhe çfarë mendoni për të tani?

Ambasadori Rajerson: Kur e takova për herë të parë, e mbaj mend shumë qartë se gjëja e parë që më tha ishte: “Kemi nevojë për disa shkolla si ajo e Harry Fultzit.” Kisha dëgjuar për këtë shkollë kur isha në Beograd nga një grua që më mësonte shqip. Kisha mësuar shumë për shkollën që më parë dhe mendova: “Ky njeri paska interes për arsimin, gjë e mirë. Kushtoji më shumë vëmendje.” E mbaj mend këtë. Mendoj se ka bërë shumë për vendin, por këtë gjë e kanë bërë edhe shumë shqiptarë të tjerë nga parti të tjera, duhet theksuar kjo. Ai ka pasur privilegjet dhe detyrimet e udhëheqjes. Mendoj se nëse e pyesni, do t’ju thotë po, ka bërë gabime. Këtë përshtypje kam. Ka vite që nuk e kam takuar, shpresoj ta takoj këto ditë.

Kam një pyetje tjetër lidhur me ato ditë. A ka pasur rol SHBA-ja në arrestimin dhe futjen në burg të Fatos Nanos, siç pretendon ai, sipas një mesazhi të Uikiliks, gjatë një takimi që kishte pasur me ambasadoren Lino? 

Ambasadori Rajerson: Jo! SHBA-ja nuk ka pasur absolutisht fare të bëjë me këtë gjë.

Pra, nuk keni qenë të përfshirë në arrestimin e tij?

Ambasadori Rajerson: Jo, jo, jo. Thuhej se ishim sepse zakonisht kur më thërrisnin në zyrën e tij, unë shkoja në këmbë. Po ecja një ditë përpara derës së ambasadës dhe shoferi më erdhi pranë e më tha: “Po të çoj unë.” I thashë: “Jo, jo.” Më tha: “Ec pra”. Kështu, hipa në makinë, më la atje dhe në atë çast, siç u pa, po bëhej arrestimi i Z. Nano dhe mua më kishin parë në presidencë.

Përse duhet ta thoshte Nano këtë?

Ambasadori Rajerson: Do t’ju duhej të pyesnit atë.  - a.th.