Qeveria e re do të reformojë agjencitë sekrete. Klosi: Shërbimet duhet të rikonceptohen

Pas Byrosë Kombëtare të Hetimit dhe një institucioni kontrollues financiar, duket se mazhoranca e re ka ndërmend të nisë edhe një reformë të thellë në fushën e shërbimeve sekrete në vend. E përditshmja Shqip, raporton se kjo reformë synon eliminimin një numri të konsiderueshëm agjencish, të cilat kanë krijuar një panoramë amullie të kompetencave dhe ndërveprimit ndaj qytetarëve. Gazeta citon burime nga PS-ja, të cilat thonë se do të eliminohen strukturat inteligjente në Ministrinë e Financave, do të reformohet thellësisht Shërbimi Informativ i Ushtrisë dhe Shërbimi i Kontrollit të Brendshëm në polici. Kjo reformë pritet që të propozohet nga qeveria e re menjëherë pas nisjes së punës në shtator.

Ndërkaq, ish kreu i SHISH-it, Fatos Klosi, në një intervistë për revistën Java, thotë se ka ardhur koha për një konceptim të ri të shërbimeve të shumta që janë sajuar në vend, shumica e të cilave për qëllime konjukturale. “Shqipëria është një vend i vogël, me mundësi të kufizuara financiare, kështu që nuk mund ta ketë luksin e mbajtjes së disa shërbimeve, e aq më keq, të pakoordinuara midis tyre”, është shprehur Klosi.

Re.Pu