Pse ishte fshirë kjo pjesë e letrës së DASH për qeverinë e Tiranës?

Dokumenti i DASH i zbuluar dhe komentuar mbrëmë në emisionin Top Story në televizionin TCH tërhoqi vëmendje edhe për një pjesë të fshirë (pjesës i ishte rënë përsipër me bojë, por gazetarët nuk kanë hequr keq për të lexuar nën të). Nuk u dhanë arsye pse ajo pjesë ishte 'fshehur', por nëse gjykon nga një tekst i botuar sot në të përditshmen DITA, këto arsye me gjasa lidhen me “zbulimin” në një farë mënyre që kjo pjesë u bën qëllimeve amerikane me presionin për dialog Serbi-Kosovë (I gjithë synimi është të ndalojnë Serbinë të ndërhyjë në punët e brendshme të Kosovës - lexohet ndër të tjera).

Ja çfarë shkruhet nën këtë pjesë të fshehur në transmetimin e mbrëmshëm, sipas të përditshmes së sipërcituar:

“Disa fakte mbi monumentin e Preshevës: Si fillim, ai është thjesht një monument. Një pllakë me disa emra mbi të. Nuk është një çështje territoresh, shkollash, zhvillimi ekonomik apo anëtarësimi në BE. Ai ishte një monument i ndërtuar ilegalisht dhe që kishte në një farë mënyre për qellim të provokonte qeverinë e Serbisë. E dyta e punës, qeveria e Serbisë tentoi të negocionte me politikanët vendas, por ata refuzuan të bëheshin pjesë e një dialogu real mbi këtë çështje. Është e vërtetë që qeveria e Serbisë mund të ishte treguar më e duruar edhe të vazhdonte tentativat për dialog, por përgjigja nga disa persona në Kosovë- (dëmtimi i varrezave) dhe përgjigja nga qeveria juaj vetëm sa i hodhën benzinë zjarrit dhe dëmtuan imazhin tuaj. Misioni i OSBE në Serbi, ambasada jonë në Beograd dhe një sërë misionesh diplomatike të tjera janë duke u përpjekur të gjejnë një zgjidhje dhe do vazhdojnë me tentativat e tyre. Ndërkohë, deklaratat tuaja vetëm sa e vështirësojnë punën tonë dhe nuk janë aspak të mirëpritura. I gjithë synimi i dialogut mes Serbisë dhe Kosovës është që të ndalojnë Serbinë të ndërhyjë në punët e brendshme të Kosovës. Nga ana tjetër, ju ndërhyni pa pikë mëdyshje në çështjet e brendshme të Serbisë…” A.N.