PS-ja përdor artilerinë e rëndë kundër Ministrisë së Punëve të Jashtme për paktin e detit

Deputeti socialist me postin më të lartë në Kuvendin e Shqipërisë për mardhëniet me jashtë, Ditmir Bushati, kritikoi ashpër Ministrinë e Punëve të Jashtme në lidhje me çështjen e marrëveshjes së kufirit detar me Greqinë. Ai, në rolin e Kryetarit të Komisionit Parlamentar të Integrimit, deklaroi publikisht se ngritja e grupit të punës për atë marrëveshje duhej të ishte realizuar dy vite më parë.

“Pas rreth dy vitesh nga vendimi i Gjykatës Kushtetuese në lidhje me shfuqizimin e ‘marrëveshjes së detit me Greqinë’, qeveria paska ngritur grup pune për të ‘studiuar’ vendimin! Kjo gjë duhet të kishte ndodhur menjëherë pas vendimit të Gjykatës Kushtetuese, së bashku me nxjerrjen e përgjegjësive për shkeljen kushtetuese të konsumuar, e cila nuk parashkruhet,” siluroi Bushati.

Kryetari i Komisionit të Integrimit më tej theksoi se “Sot, Ministria e Punëve të Jashtme duhet të ishte në gjendje të prezantonte vizionin e saj strategjik me të gjithë aktorët politikë dhe shoqërorë, për të arritur në një zgjidhje të drejtë, e jo të belbëzonte në mënyrë kontradiktore për një çështje kaq të rëndësishme!”.

Bushati gjithashtu siluroi dhe qëndrimet kontradiktore të zyrtarëve të lartë të Ministrisë së Jashtme në lidhje me çështjen e grupit të punës apo për faktin e nisjes ose jo të negociatave. “Deklaratat e Ministrit të Jashtëm Panariti dhe Sekretarit të Përgjithshëm, Turdiu, janë kontradiktore dhe të lënë shijen e keqe që me një çështje kaq të rëndësishme spekulohet e si përfundim nuk nxirret asgjë! Kjo është një gjyle që ia krijoi qeveria vetë vetes dhe tani s’di ç’të bëjë me të,” theksoi Bushati.

Re.Pu.