Presidenti Nishani uron Festën e Bajramit: Nuk ka gjë më të aftë se kjo festë për ta larguar urrejtjen dhe afruar dashurinë
Presidenti i Republikës, Bujar Nishani ka uruar të gjithë besimtarët mysliman me rastin e festës së Fiter Bajramit. Me anë të një mesazhi drejtuar besimtarëve, Nishani theksoi rëndësinë e kësaj dite të bekuar për gjithë komunitetin mysliman. Kjo festë, sipas Presidentit Nishani pakëson veset dhe shton virtytet, largon urrejtjen dhe afron dashurinë.
Mesazhi i plotë i Presidentit:
Fort të dashur, të nderuar dhe të respektuar besimtarë myslimanë,
Me gjithë zemër ju uroj Gëzuar Bajramin!
Nuk ka gjë më të aftë se kjo festë për ta larguar urrejtjen dhe afruar dashurinë, pakësuar veset dhe shtuar virtytet, harruar mëritë dhe sjellë pajtimet.
Është kjo Festë e madhe që ka aftësinë e rrallë për t’i bërë të rinjtë më të pjekur, të moshuarit më të rinj, të sëmurët më të shëndetshëm, të shëndetshmit më të mëshirshëm, fatkeqët më pak të dëshpëruar, fatlumturit më të përmbajtur, fukarenjtë me më tepër shpresë, zengjinët më zemërgjerë.
Ditët e Ramazanit, ato ditë të udhëtimit shpirtëror brenda vetes përmes vetsakrifikimit, janë rasti më i mirë për realizimin e një marrëdhënie më të afërt dhe më të drejtpërdrejtë me Zotin, për të ardhur me shpirt e trup të pastër dhe zemër të hapur në këtë ditë të madhe, në këtë festë të gëzueshme, që është Dita e Bajramit.
Kjo Festë pas asaj sakrifice, është rasti fatlum për ndriçimin e shpirtit, kthjellimin e mendjes, ngrohjen e zemrës, forcimin e trupit, ripërtëritjen e shqisave, ngjalljen e shpresave, shtimin e dashurisë për tjetrin, mëshirës për të vobektin, kujdesit për të sëmurin, respektit për të moshuarin, prindin, familjen, të afërmit, dhe të gjithë të tjerët.
Ta festojmë Bajramin si duhet, si na ka hije; si besimtarë të devotshëm dhe njerëz të qytetëruar, që njohim dhe respektojmë normat e Besimit; me gëzim të përmbajtur, vëllazërim me njëri-tjetrin, dhe kryesorja; mirënjohje për Zotin.
Uroj edhe jomyslimanët, të cilët në respekt të tjetrit dhe për të mirën e vetes, mbajnë Ramazanin dhe respektojnë Bajramin.
Gëzuar Bajramin, të gjithëve!
Add new comment