Presidenti bëhet bujar; firmos që SHQUP t’i kalojë partisë së vet

Presidenti Bujar Nishani (si komandant i Përgjithshëm i Forcave të Armatosura) e ka firmosur dekretin për nxjerrjen jashtë inventarit të ushtrisë, të godinës së SHQUP-it. Ky dekret ka mbërritur në zyrat e ministrisë së Mbrojtjes këtë pasdite, po aq fshehtaz sa edhe u mor vendimi përkatës nga qeveria. TCH citon burime nga ministria e Mbrojtjes, ndërsa zyra e shtypit e presidencës kontaktuar nga kanali në fjalë, dha përgjigjen “keni telefonuar jashtë orarit zyrtar”. Por ndërkaq, mungesa e firmës së shefit të shtabit të përgjithshëm, i cili bën kërkesën për çdo tjetërsim të pronave të ushtrisë, e bën antiligjor këtë kalim pronësie të SHQUP-it në seli të Partisë Demokratike. TCH citon edhe ministren e ardhshme të Mbrojtjes, Mimi Kodheli, që është shprehur kundër këtij veprimi, por edhe faktin e një shkrese dërguar nga shefi i shtabit Xhemal Gjunkshi, pranë sekretarit të përgjithshëm të ministrisë së Mbrojtjes përmes të cilës ai kundërshton kalimin e SHQUP-it si seli e PD. Gjithsesi, kreu i Shtetit e justifikoi kuptimin e emrit të tij, kur vjen puna për t’i dhuruar partisë së vet prona shtetërore.

a.k