President jodinjitoz, k/ministër që di veç të shajë, k/parlamentare si Ponc Pilati dhe shoqëri që vret me heshtje...

'Përmbledhja' e mësipërme është Shqipëria e sotme përballë grevës dramatike të ish-të përndjekurve politikë - sipas Sami Repishtit, një ish-i burgosur politik i njohur. Në një intervistë në VOA, z.Repishti , që sot jeton në Nju Xhersi në SHBA tha për grevën e urisë në Tiranë: "Në qoftë se sot ish-të persekutuarit protestojnë, kjo tregon se ekstremi i zhgënjimit të tyre nga pushteti në fuqi është i plotë. Presidenti bëri një deklaratë jo dinjitoze duke thënë se “duhet një dialog, por unë nuk mund të përfshihem.” Kush mund të përfshihet në qoftë se Presidenti nuk mund të përfshihet?... Kryeministri hesht sepse nuk ka çfarë të thotë, përveç sharjeve. Kryetarja e parlamentit ka reaguar si Ponc Pilati, “unë nuk kam gjë për të thënë,” thotë. Dhe ajo vjen nga një familje e persekutuar... Edhe shoqëria shqiptare për fat të keq po tregon dobësinë e një fibre të saj morale, për mendimin tim. Ajo mban një heshtje që vret. Ajo po tregon një indiferencë që ofendon. Ajo po tregon gjithashtu edhe një farë përbuzjeje, që mbulon me turp të gjithë ata që e ushqejnë.."
Më pas, prof.Repishti pyetet se sa të justifikuara janë ato që deklaron qeveria në Tiranë se ka bërë shumë për të dëmshpërblyer ish të burgosurit dhe se buxheti i shtetit nuk lejon më tepër. Përgjigjja: "...Unë e dëgjova deklaratën e ministrisë së Financave dhe për mendimin tim është një paturpësi. Ka 22 vjet që ka filluar tranzicioni demokratik në Shqipëri. Është caktuar që për çdo vit atyre t’u jepet një e teta e dëmshpërblimit. Deri tani, për 22 vjet, ata kanë marrë vetëm një këst. Janë shumë të paktë ata që kanë marrë këstin e dytë. Si mund të justifikohet qeveria se ka mbajtur premtimin e saj, ndërkohë që nuk u ka dhënë atyre shtatë këste të tjerë, por u ka dhënë vetëm një? Kjo është një manovër... Çështja e buxhetit është diçka që është rregulluar më përpara dhe nuk është diçka që e ka gjetur qeverinë të papërgatitur. Ose qeveria ka konsumuar paratë e ish të burgosurve për probleme të tjera, ose qeveria është krejtësisht e papërgjegjshme dhe nuk dëshiron t’i paguajë ata.." - A.N.

Intervista e plotë:
http://www.zeriamerikes.com/content/repishti-inetrview/15241...