Preferuan të mos japin asnjë mendim dhe të mos flasin me emër...

Në faqet e shtypit të ditës vihet re prej muajsh një fenomen: kur vjen në rend dite diskutimi i një nisme qeveritare apo i një projektligji ose nuk ka më prononcime publike nga njerëz të fushës ose ato që janë, editohen me burime "që nuk flasin me emër".
Lexoni lajmet për arsimin; reformat, vendimet në këtë fushë janë të shumta. Nuk gjen asnjë mësues apo drejtues shkolle të shprehë një kritikë me emër. Provoni pyesni privatisht një të njohur ose një familjar që bën këtë punë. Ka dhjetëra vërejtje (sidomos për tekstet shkollore) por nuk e shqep gojën: ka frikë për vendin e punës. Sëmundja e frikës së fundmi ka zënë edhe mjekët, që kanë qenë një nga komunitetet më autoritarë në vend. Shihni cfarë shkruan një lajm në të përditshmen Gazeta Shqiptare:  
"Disa ditë pas daljes së vendimit të Këshillit të Ministrave për riorganizimin e shërbimeve në Qendrat Spitalore Universitare, shefat e shërbimeve pranë QSUT-së janë të paqartë me atë çka do të ndodhë realisht. Sipas tyre ata nuk janë njoftuar për reformën, ndërsa kanë dëgjuar nëpërmjet medias se do të ketë një përgjysmim të numrit të shërbimeve, nga 60 që janë aktualisht në 30 të tillë. Për këtë arsye, ata kërkojnë një shpjegim të detajuar nga ministri i Shëndetësisë, Vangjel Tavo, në lidhje me strukturën e re. “Duhet të dalë vetë ministri e të shpjegojë se cilat janë shërbimet që do të shkrihen e cilat janë shërbimet që do të mbeten. Ne aktualisht nuk dimë asnjë gjë, por vetëm kemi dëgjuar nëpër media se do të ketë përgjysmim të numrit të shërbimeve. Për mendimin tim duhet të thuhen këto gjëra, duhet të ketë transparencë”, - tha për “Gazeta Shqiptare”, një prej shefave të shërbimit. Ne kontaktuam me disa prej tyre, të cilët preferuan të mos japin asnjë mendim dhe të mos flasin me emër..." (a.th.)