Policë të Shtetit apo xhelatë të gjobave?

Është më mirë të mos i  ndalosh patrullave të policisë rrugore. E thonë ata që i gjen pas dyerve të komisariateve për të paguar gjobat e pamëshirshme të atyre që mbajnë të veshur uniformën e policisë së shtetit dhe që sillen si të ishin xhelatë me qytetarët.

Ndoshta është e vetmja polici në rruzull që ngre kurthe në rrugët kombëtare për të kapur në shkelje ata drejtues  automjetesh që ndalojnë për të respektuar shtetin dhe ligjin.  

Kjo polici është inekzistente para atyre që vazhdojnë ta shkelin rregullat me të dyja këmbët dhe që nuk denjojnë të heqin këmbën nga gazi e jo më t’i ndalojnë shefave të qarkullimit që kanë marrë në dorë kamzhikun për të gjobitur vetëm “ të urtët” dhe për të nderuar si gjithmonë “të fortët”.

Janë policië që fshihen pas ferrave në autostradë për të matur me radarë shpejtësinë e që me të ndaluar të kërkojnë patentën duke mos të dhënë fare kohë për sqarime të mëtejshme.  Duhet mbushur sa më shpejt fleta e gjobës për të kaluar në sistemin që të detyron të paraqitesh në komisionin e të tjerë namuzqarëve me uniformë që kanë në dorë lirinë tënde të lëvizjes.

Kështu nëse jeton në Sarandë dhe të ndalon policia e Fierit, duhet të kthehesh sërish në Fier për të dalë para xhelatëve të komisionit, që nëse nuk u punon interneti të thonë të vish një ditë tjetër se nuk është faji i tyre, por i sistemit.

Shumë drejtues automjetesh e kanë provuar vetë se çdo të thotë t’i dedikosh ditën paraqitjes në komisionin e heqjes së patentave dhe në fund të marrësh mandatën se leja e drejtimit t’u hoq për 6 muaj, sepse tejkalove me disa kilometra në orë shpejtësinë në autostradën e mbaruar Lushnjë-Fier.

Teksa po i kërkoja sqarime policit në sportelin e informacionit se përse nuk njofton qytetarët për defektet teknike të zyrave të policisë dhe oraret e paraqitjes në komision, më tha se kot ankohesha pasi po jetoj në vendin më të bukur në botë.

Policia e re e drejtuar nga Sajmir Tahiri është e njëjta polici. Askush nuk troket në dyert e qytetarëve për të pyetur lidhur me sigurinë e tyre dhe problemet e jetës në komunitet. Është e njëjta polici që po ndryshon vetëm fasadën, por që punon me bllok për të realizuar planin e gjobave, është e njëjta polici që nuk di të këshillojë, e njëjta polici që nuk di të komunikojë, e njëjta polici me miq e me shokë, e njëjta polici që si plastelinë ka marrë formën e shefit, arrogancën dhe fodullëkun e Sajmirit që ka fatin ta drejtojë.

leonard mitro