Pengohet përfaqësimi i shqiptarëve në forcat e policisë maqedonase
Përfaqësimi i shqiptarëve në Ministrinë e Brendshme ka nxitur debate dhe deklarata kontradiktore midis zyrtarëve maqedonas dhe shqiptarë në Maqedoni. Agjencia “INA” shkruan se zëvendësministri i brendshëm Zemri Qamili dhe Avokati i Popullit, Ixhet Mehmeti kanë shprehur vërejtje lidhur me përfaqësimin e shqiptarëve në MPB, por ministrja Gordana Jankulovska bëri të qartë se tema e përfaqësimit është e mbyllur në shumë njësite të MPB-së. Ajo në mënyrë indirekte paralajmëroi se fokusi do të jetë i përqendruar në përfaqësimin e bashkësive tjera etnike joshqiptare. Sipas “INA”-s, zv.ministri Qamili theksoi se varësisht se sa policë do të pranohen në konkurs, 26 për qind prej tyre do të jenë shqiptarë, me qëllim që sipas tij të arrihet përfaqësimi i drejtë i shqiptarëve në MPB. Mirëpo kjo deklaratë e tij është hedhur poshtë në mënyrë indirekte nga ministrja Jankulovska. Edhe Avokati i Popullit ka deklaruar ka rritje simbolike të shqiptarëve në MPB. Sipas raportit të tij të publikuar për vitin 2013, në këtë ministri shqiptarët janë të përfaqësuar me rreth 17%. “INA” sqaron se kjo përqindje simbolike është në njësitet speciale, ku në disa prej tyre nuk ka edhe asnjë shqiptarë. Kjo çështje ka qenë temë debati e problematik për vite me radhë që pas firmosjes së Marrëveshjes së Ohrit.
L.V
Add new comment