PD-ja koalicion me Partinë e Punës (të riorganizuar)?

Zëvendësministri i Brendshëm, Ferdinand Poni, i cili është funksionar i lartë i Partisë Demokratike, ka reaguar pas shkrimit të botuar në gazetën “SOT” me titull: “Berisha u shtrin dorën komunistëve për aleancë në zgjedhjet e 23 Qershorit, Poni negociata me kreun e PPSH, Marko Dajtin”. Zëvendësministri Poni ka deklaruar se nuk e ka takuar kreun e Partisë së Punës (të riorganizuar), Marko Dajti, e aq më tepër që të ketë biseduar me të për çështje koalicionesh. Poni pohoi se nuk e kishte takuar asnjëherë kryekomunistit. Ai gjithashtu mohoi që mes PD dhe komunistëve të ketë negociata për koalicion.

Ja ç’raportonte gazeta "SOT" në shkrimin e sipërcituar: 

“Pasi shpalli moton në mbledhjen e Kryesisë “koalicion me çdo parti” për t’u rikonfirmuar në pushtet më 23 Qershor, kreu i ekzekutivit ka filluar lëvizjet në terren për të mbledhur parti të majta apo të djathta, komuniste apo nacionaliste, balliste apo minoritare, rreth Partisë Demokratike, e cila do të jetë qendra e gravitetit në koalicionin e djathtë. Grupi i posaçëm në PD i ngritur për aleanca, i kanë kërkuar Partisë Komuniste të Riorganizuar bashkëpunim parazgjedhor. Por pasi ka marrë përgjigje negative nga kreu i Partisë së Punës së Riorganizuar, Marko Dajti, grupi negociator po josh disa elementë të përjashtuar vitet e fundit nga Partia e Punës së Riorganizuar, me qëllim për të përçarë komunistët. Lajmi konfirmohet nga kreu i Partisë së Punës së Riorganizuar, Marko Dajti, i cili deklaroi se shumë të përjashtuar nga partia po ofrohen pranë PD pikërisht në prag të zgjedhjeve të 23 Qershorit. “Disa fundërrina të përjashtuar nga Partia e Punës po afrohen pranë PD në prag të zgjedhjeve parlamentare. Ç’është e vërteta, ky llum i përjashtuar, po joshet nga PD, pasi pas tyre sheh vota për zgjedhjet e 23 Qershorit”, theksoi Dajti”. Re.Pu.