Pavarësi komplet! Jo, - shkruan shtypi gjerman dhe e quan elitën kosovare "fshatare dhe një problem për BE-në"

“Pavarësi komplet” – shkruhet në ballinën e numrit të sotëm të së përditshmes “Express”. Shkruan “Express”: Nga sot, pavarësia e Kosovës nuk do të jetë e kushtëzuar. Institucionet e vendit i morën komplet kompetencat që i kishte deri më tash Zyra Civile Ndërkombëtare”. Më pas ka përmendur një metaforë të Martti Ahtisaarit “Sikur edhe cigaret, edhe mandatet ndërkombëtare ofrojnë lehtësim, por kanë efekte anësore të dëmshme dhe mund te rezultojnë në varshmëri të rrezikshme”.

Kurse “Koha Ditore” tërheq vëmendjen mbi qëndrimin e Vetëvendosjes së Albin Kurtit (deputetët e kësaj lëvizje nuk morën pjesë në seancën solemne me rastin e përfundimit të mbikëqyrjes ndërkombëtare në Kuvendin e Kosovës). “Filmi ‘Bac, u kry!’ po shndërrohet në seri. Dikur e kishim ‘Bac, u kry!’ dhe tash e kemi ‘Bac, u kry!’ pjesa e dytë. Prej këtij pushteti kemi gjithnjë e më shumë cirk, sepse kemi gjithnjë e më pak bukë”, ka thënë Kurti...”

Shtypi evropian e ka përcjellë gjithashtu ngjarjen, por me më shumë pak entuziazëm se politika zyrtare në Prishtinë. E përditshmja gjermane “Frankfurter Allgemeine Zeitung” vëren: "...Megjithatë, në retrospektivë 10 shtatori 2012 me gjasa do të vlejë më shumë si një pikë e shënuar formale, pasi pavarësia e Kosovës do të vazhdojë të jetë si e mbikëqyrur ashtu edhe e papërsosur. E papërsosur, sepse shteti i dytë më i ri në botë, ndryshe nga ai më i riu (Sudani i Jugut), nuk është anëtar i Kombeve të Bashkuara si dhe i organizatave të tjera të bashkësisë ndërkombëtare, për sa kohë që Serbia dhe Rusia vazhdojnë ta pengojnë aderimin në to. E mbikëqyrur, sepse me gjithë shpërbërjen e ICO-s ka ende një sërë institucionesh, të cilat nuk ua shqepin sytë politikanëve kosovarë. Mandati i misionit të BE-së për policinë dhe shtetin ligjor EULEX zgjat të paktën deri në qershor 2014, e edhe trupa mbrojtëse ndërkombëtare për Kosovën KFOR, e cila drejtohet prej vitesh nga komandantë të Bundesëehr-it që ndërrohen, vazhdon të jetë e stacionuar në Kosovë...”

Kurse "Süddeutsche Zeitung" e vendos theksin edhe tek mungesa e ballafaqimit me historinë e re në Kosovë dhe vëren se “elita e re e Kosovës, me karakter fshatar dhe e dalë nga ushtria ilegale UÇK, e ka infiltruar administratën me ndihmës militantë. Partia Demokratike e Thaçit (PDK) cilësohet prej vëzhguesve të pavarur si rrjet klientelizmi dhe 'oktapod korrupsioni. Kosova mbetet edhe pas tërheqjes së autoritetit administrativ ndërkombëtar një problem për BE-në, me lloj-lloj potenciali rreziqesh." – shkruan Süddeutsche Zeitung. – A.N.