Pasaktësitë qesharake të Daily Mail për Sazanin dhe acarimi i drejtë i lexuesve të Respublica-s

Lajmi i botuar nga tabloidi britanik Daily Mail mbi mundësinë e helmimit nga gazi mustard të marinsëve britanikë në ishullin e Sazanit, teksa niset të përçohet si “skandal”, në fakt ka pasaktësi skandaloze. Fakti që Respublica e pasqyroi pa ndërhyrje këtë njoftim, ka sjellë reagimin e lexuesve. Me të drejtë, por nga ana tjetër qëllimi ishte të tregohej se raportime sipërfaqësore e qesharake gjen rëndom edhe në media perëndimore, aq më tepër në gazeta që marrin përsipër material për të cilat s’kanë as këllqe, as informacion. Teksti është shkruar nga korrespondenti i mbrojtjes Mark Nikol, i cili së pari s’ja ka idenë e hartës së Ballkanit, përderisa fut Malin e Zi në Republikën e Shqipërisë; së dyti ka formim të mangët historik dhe shkon e shkruan se sovjetikët janë larguar nga Shqipëria në vitet 80-të (?!), së treti nuk e di se Sazani ka qenë i banuar vazhdimisht deri në fillim të viteve 90-të. Dhe së fundi, pasi shkruan çfarë i do qejfi, hedh dyshimin se mbase nuk e ka fajin gazi mustard për helmimin e marinsave britanikë, por një bimë helmuese që rritet në ishull.

Kështu ndodh kur një gazetë e specializuar në thashetheme rozë, bën kompetenten edhe në fusha që janë krejt jashtë sferës së saj.

a.k