Pas intervistës së Ekrem Bardhës, vjen reagimi: Kisha Ortodokse është plotësisht Autoqefale. Kjo falë punës së Kryepeshkopit Anastas

Kisha Ortodokse e Shqipërisë ka reaguar publikisht ndaj një intervistë të botuar në gazetën “Panorama” me 16 qershor, ku shqiptaro-amerikani i njohur Ekrem Bardha deklaronte se “me Janullatosin, Kisha është e varur nga influenca greke e sllave”. Në këtë intervistë, Bardha shprehej se me veprimtarinë e tij, Anastas Janullatos “e ka zhveshur këtë kishë nga autoqefalia që Fan Noli themeloi 100 vite më parë”. (Lexo intervistën e plotë: http://www.panorama.com.al/2014/06/16/bardha-me-janullatosin-kisha-eshte-e-varur-nga-influenca-greke-e-sllave/)

Pas këtyre deklaratave, 4 klerikë të Kishës Ortodokse kanë nënshkruar një deklaratë publike në të cilën kritikojnë ashpër Ekrem Bardhën.“Në gazetën “Panorama”, të së hënës, 16 qershor 2014, ka një shkrim të tillë, me titull “Me Janullatosin Kisha është e varur nga influenca greke e sllave, nga “shqiptaro-amerikani” Ekrem Bardha, që nga sa duket nga mënyra e të shprehurit, amerikane ka vetëm paratë. Ai pretendon se “Kryepeshkopi Anastas e ka zhveshur këtë kishë nga autoqefalia e Fan Nolit” Nuk e di nëse z. Bardha ka qenë me pushime dhe nuk e ka ndjekur atë që ndodhi më 1 Qershor në Tiranë, por e njoftojmë se në kryeqytetin e Shqipërisë u mblodhën të gjitha Kishat Ortodokse të botës, 4 patriarkë, 4 kryepeshkopë dhe përfaqësuesit e 4 patriarkëve të tjerë, pikërisht për të afirmuar atë që na e mohon z. Bardha. Kisha Ortodokse e Shqipërisë jo vetëm është plotësisht Autoqefale, si asnjëherë në historinë e vendit tonë, por është e barabartë me të gjitha Kishat e tjera Ortodokse, të cilat pa asnjë përjashtim e njohin dhe e pranojnë si të tillë. Kjo është vepër madhore e punës së jashtëzakonshme të Kryepeshkopit Anastas, që e ka ngritur Kishën tonë më lart se kurrë” shkruhet në reagimin e Kishës Ortodokse.

Ndërsa jepen kundërargumentet e deklarimeve të Bardhës në intervistë, Kisha Ortodokse shkruan se “kjo mënyrë të shprehur dhe të sjelli ndaj Kishës Ortodokse Autoqefale të Shqipërisë, nuk e forcon bashkimin kombëtar dhe harmoninë fetare, por i cënon ato”. Reagimi mban emrat e klerikëve shqiptarë të Kishës Ortodokse Jovan Korroveshi, Gjerasim Çakalli, Stavri Çipi dhe Spiro Kostoli.

Lexo reagimin e plotë: http://orthodoxalbania.org/old/index.php/lajme/2265-pergjigje-ndaj-disa-qendrimeve-kunder-kishes-orthodhokse-autoqefale-te-shqiperise-te-z-ekrem-bardha

n.k