Partia që qeveris mendon që fajin për korrupsionin e ka... "çifti Spahiu"

Partia Demokratike ka reaguar në lidhje me raportin e ‘Transparency International’, që e cilëson Shqipërinë si vendin më të korruptuar në Europë, duke zbritur dhjetra vende. Fajin e ka "çifti Spahiu" - mendon partia që qeveris.

Në emër të PD foli deputeti Gerdi Bogdani: “Problemi akut me indeksin e perceptimit të korrupsionit është gjendja në qeverisjen e gjyqësorit, gjatë periudhës në monitorim. Perceptimi dhe dëshmi të shumta publike flasin për vende pune dhe karriere për gjyqtarë, të cilët janë shitur me çmime prej 200 mijë eurosh, në kohën kur drejtësine e qeveriste padroni i ‘Transparency Internacional Albania’ dhe padroni i tij në krye të KLD-së. Ky indeks korrupsioni në gjyqësor nuk njollos dot punën e Qeverisë shqiptare në luftën kundër korrupsionit dhe në qeverisjen e vendit. Nuk njollos dot arritjet tona të admirueshme dhe çifti Spahiu  nuk i mashtron dot shqiptarët dhe nuk na shpërqendron dot asnjë grimë nga beteja jonë në luftën kundër korrupsionit". A.N.