Paradoks berishian: Papunësia pakësohet kur punësimi nuk shtohet!!!

Teksa përuronte për të N-tën herë një rrugë diku në zonën rurale të Shkodrës, Berisha dha sot edhe një leksion të shkurtër ekonomie. Sipas tij, modeli ekonomik i qeverisë së tij është shkaku kryesor që papunësia është pakësuar në mënyrë progresive në Shqipëri, ndërkohë që është shtuar në të gjithë Europën për shkak të krizës ekonomike.
Dhe ku e bazon Berisha këtë deklaratë mbi mrekullinë e modelit të tij ekonomik?
Në shifrat e INSTAT-it, të cilit i referohen më pas edhe raporte rutinë ndërkombëtarë. Dhe INSTAT-i e bazon raportimin e papunësisë në listat e atyre që regjistrohen për punë në zyrat shtetërore.
Po ata që nuk regjistrohen? Për INSTAT-in ata nuk janë të papunë…
Sidoqoftë, ka një mënyrë të tërthortë për të vlerësuar sesi kanë shkuar punët me papunësinë – nëpërmjet shifrave të punësimit.
Në tabelën e punësimit që ka publikuar INSTAT-i në internet (http://www.instat.gov.al/graphics/doc/tabelat/Treguesit%20So... ) shohim se në fund të vitit 2011, numri i të punësuarve ishte 928,052. Ndërsa në fund të vitit 2005, numri i të punësuarve ishte 932,102. Pra, gjatë qeverisjes së Berishës, numri i të punësuarve është ulur plot 4,050.
Dhe kur punësimi nuk qenka shtuar, si qenka ulur papunësia? Apo ndoshta të papunët ia kanë mbathur nga Shqipëria drejt vendeve europiane në krizë?
E.Zaloshnja