Paloka kërkon kartelën mjekësore të Tahirit. Sinjali se ç’lloj opozite do bëjë PD

Kryetari i komanduar i grupit parlamentar demokrat, Edi Paloka, dha sinjalin e parë të nivelit të opozitëbërjes që do të bëjë e djathta, kur në një prononcim për Neës 24 i kërkoi presidentit Nishani që të kontrollojë kartelat mjekësore të ministrave të rinj, pasi disa prej tyre, si Saimir Tahiri, janë me probleme mendore. “Të them të drejtën ndonjërit i trembem, sepse ndonjëri që ka marrë poste të rëndësishme në qeveri, ka pasur probleme me mendjen. Tahiri ka pasur disa problem. Zoti Nishani bën mirë t’ju kërkojë raport mjekësor ministrave. Një ministër i Brendshëm me probleme psikike do të ishte e rrezikshme”, tha Paloka, një eksponent i PD-së që mbahet mend për një seri përplasjesh fizike jashtë dhe Brenda sallës së parlamentit, ndër to dhe grushti ndaj ish ministrit të Mbrojtjes Arben Imami. Paloka ka pasur diçka për të thënë edhe për rezultatin e zgjedhjeve, duke vijuar tezën më të preferuar të PD-së: “Ka pasur disa faktorë, por sa për Ramën nuk ka marrë më shumë deputetë seç ka marrë më përpara. Ajo që i ndryshoi gjërat ishte LSI. Rama nuk është votuar për kryeministër, duhet të merrte të paktën 70 deputetë që shqiptarët ta kishin votuar për kryeministër. Jam i bindur që shpejt të gjithë ata që për një arsye apo një tjetër u mërzitën me PD, dhe vendosën të flenë me mullixhiun, për më tepër me një si Rama, shpejt do ta kuptojnë gabimin. Ata që e shitën votën besoj i kanë mbaruar ato lekë dhe do fillojnë të reflektojnë”.

a.k