Përfytyroni një profesor shqiptar që i provon ministrit "plagjiaturë" dhe "mashtrim të qëllimshëm"

Të kopjosh paragrafë në një tezë doktorature mund të jetë e pranueshme për vende ku hajdutëria në qeverisje nuk ndëshkohet, por jo për gjermanët. As nëse ke vjedhur 33 vjet më parë. Një skandal i ri plagjiature ka plasur në Gjermani, kësaj here (ironike) rreth ministres gjermane të Arsimit. Universiteti i Dyseldorfit ka hapur një procedurë për heqjen e titullit shkencor dhe ministrja rrezikon të humbasë të gjitha postet politike.

Shkruan Deutsche Welle në faqen online: "Libri, i cili vendos për të ardhmen e ministres gjermane të Arsimit, është i rëndë. 351 faqe i trashë është ai dhe mban titullin patetik "Personi dhe ndërgjegjja". Libri është publikuar si punim doktorature në vitin 1980 nga studiuesja e re dhe me ambicie e shkencave filozofike, Annette Schavan. Për vite me radhë askush nuk i kishte kushtuar vëmendje disertacionit. Por jo shumë kohë më parë, gjurmues anonimë të plagjiaturave në internet, dëshmuan se ish-ministri gjerman i Mbrojtjes Karl-Theodor zu Guttenberg, kishte marrë nga autorë të tjerë, libra dhe artikuj gazetash, pjesë të tëra të disertacionit të tij. Guttenberg humbi titullin "doktor i shkencave" dhe postet e tij politike, dhe gjurmuesit e plagjiaturave nisën të hetonin disertacione të politikanëve të tjerë të njohur.Kështu ndeshën në "Personi dhe ndërgjegjja", të shkruar nga ministrja aktuale e Arsimit, Annette Schavan. Gjatë hulumtimit të mëtejshëm gjetën pasazhe të kopjuara, jo në mënyrë aq masive sa në rastin e Guttenberg-ut, por sidoqoftë 130 paragrafë. Pas kësaj Annette Schavan i kërkoi komisionit të promovimit në Universitetin e Dyseldorfit të merrej me shqyrtimin e rastit. Kryetari i këtij komisioni iu vu punës dhe në vjeshtë 2012 në eskpertizën e tij arriti në një përfundim katastrofal. Në konkluzionet e tij ai flet për "plagjiaturë" dhe "mashtrim të qëllimshëm". Të martën (22.01.) u mor një vendim i përkohshëm i qartë: me 14 vota pro dhe 1 votë kundër, Këshilli i Fakultetit në Dyseldorf vendosi se akuzat janë aq fort të bazuara në fakte, sa do të hapet zyrtarisht një procedurë për heqjen e titullit shkencor ministres. Procedura do të zhvillohet me "rezultat të hapur", tha Bruno Beckmann, dekan i Fakultetit të Filozofisë, pas një mbledhjeje disaorëshe. Për Annette Schavan, procedura në zhvillim e sipër do të jetë një barrë e rëndë në fushatën elektorale, që sapo ka nisur, për parlamentin federal..." A.N.