Përdorni çdo mundësi për të rritur sensibilitetin, të shpëtojmë qytetin - thotë Lame për "Planin e ri të Tiranës"

Plani praktikisht, e them këtë me përgjegjësi, zhduk gati të gjitha zonat e gjelbra ekzistuese brenda qytetit.

Për shembull, parku i Namazgjasë zhduket. Plani në atë lulishte të të gjithëve ne, është që të zhvillohen struktura të larta. Citoj planin tek zona e gjelbër tek Shqupi, anës Lanës dhe Bankës Tregtare e Pallatit të Oficerëve, planifikohet banim e shërbime publike dhe qëllime fetare, se është katedralja katolike atje, ndërsa lartësia do të jetë deri 9 kate.

Edhe Qyteti Studenti parashikohet që të trajtohet si zonë për shërbime publike dhe zonë banimi. Fusha e sportit pas “Qemal Stafës”, e vetmja fushë që ka mbetur brenda qytetit, përzgjidhet për banim dhe shërbime publike 9 kate. Zona  “Ali Demi”, që në një pjesë sapo është bërë park bëhet banim dhe shërbime publike. Ekspozita “Shqipëria Sot”, e njëjta gjë, parku i lodrave tek “7 xhuxhat”, banim dhe shërbime publike, lartësia 9 kate. Zona tek lulishtja e “Vëllezërve Frashëri”, banim dhe shërbime publike, struktura të larta. Zona e “Shkollës së Bashkuar” gjithashtu. Lulishtja tek Biblioteka Kombëtare, ndërtime me lartësi të propozuar 9 kate. Pas Pallatit të Kulturës, planifikohen gjithashtu zhvillime të stukturave të larta. Tek Fusha e Aviacionit, zhduket nga zona e listave të gjelbra, një lulishte madhore e sapopërfunduar...Zona e tregut tek “Farmacia 10”, zona e “Kinostudios” gjithashtu planifikohen me ndërtime. Kjo listë nuk ka fund...

Përmbledhjen e mësipërme e bën Artan Lame lidhur me "Planin e Ri Urbanistik të Tiranës". I ftuar në studion e edicionit qendror të lajmeve në “Top-Channel”, Artan Lame, aktivist dhe drejtues i një lëvizje për mbrojtjen e vlerave dhe trashëgimisë kulturore, tha ndër të tjera: 

"Lulishtet që kemi sot kanë shpëtuar, pasi në planet rregulluese, ishin përcaktuar në letër si sipërfaqe e gjelbër ku nuk lejohej të ndërtohej. Ky plan i heq të gjithë këto kufizime, e lë të lirë gjithë qytetin, në diskrecion të Bashkisë, që do e jep ose do nuk e jep lejen në bazë të vullnetit të saj. Gjëja e fundit, që më dhëmb edhe më shumë, zonat e mbrojtura të qytetit, nga viti 2000, të mbrojtura me VKM që u vunë në mbrojtje përgjatë bulevardit, zona e vilave përgjatë rrugës Elbasanit dhe ato në zonën e bllokut, duke i thënë ndërtuesve që nuk ndërtohet, plani i heq dhe i lejon të bëhen pallate.  Përdorni çdo mundësi për të rritur sensibilitetin, të shpëtojmë qytetin. I bëj thirrje të gjithë qytetarëve të Tiranës, që pavarësisht bindjeve, të bashkohen për të kundërshtuar këtë projekt". A.N.