Për gjermanët Super Mario është Monti, jo Balotelli

Në kancelarinë gjermane Mario Monti-n, kryeministrin italian, kanë zënë ta thërrasin Super Mario. Monti-t, profesorit të respektuar të ekonomisë, gjësë më të mirë që i ka qëlluar Italisë të ketë në këto kohë të krizës (kështu mendojnë ca e ca në Gjermani), nuk mendohet se mund t’i vijë keq për këtë nofkë. Përkundrazi. Kjo nofkë lindi në klimën e Europianit të futbollit, saktësisht pas ndeshjes Gjermani-Itali, të fituar nga kjo e fundit me ndihmën e Mario Balotelli-t, të njohur prej kohësh si Super Mario. Dhe në një kohë që Super Mario i kombëtares italiane po gjunjëzonte kombëtaren gjermane, Super Mario tjetër, Mario Monti pra, po gjunjëzonte Angela Merkel-in në summit-in e krerëve të shteteve e të qeverive të vendeve të BE-së.

“Unë nuk do ta nënshkruaj Paktin e Rritjes, nëse ju të gjithë s’bini dakord të bëjmë diçka lidhur me përqindjet e larta të interesit që Italia po paguan me pahir për bonot e veta shtetërore”, u tha ai kolegëve të pranishëm. “Ju doni të na mbani peng të gjithëve?”, bëri pyetjen me ton nervoz kryeministri danez Helle Thorning-Schmidt. Ndërsa kancelarja gjermane u mjaftua të thosh, se “kjo që po thoni nuk na ndihmon të ecim përpara”. Dhe për të dhënë idenë se s’kish kohë, i tha Monti-t, se “duhet të vendosim shpejt, pasi unë nesër në mesditë, të premten, duhet të jem në Berlin për një votim në Bundestag”. Dhe Monti i tha: “Shkoni në Berlin. Nuk ka problem. Unë jam gati t'ju pres këtu deri të dielën”. Ishte ky qëndrim i palëkundur, sipas Spiegel-it online, që e bëri Merkel-in të tërhiqej. Dhe kjo ndërhyrje është konsideruar si goli i madh i Super Marios. Kryeministrit, jo futbollistit.

E.G.