Ose në Departamentin e Thesarit, ose në të Buxhetit, diçka s’shkon…

Në një lajm të djeshëm, njoftuam për një raportim të gazetës Shqip rreth një projekt-vendimi të hartuar në 28 gusht nga Departamenti i Buxhetit në Ministrinë e Financave, sipas të cilit, më 7 shtator do të ndërpriten/kufizohen tenderët e rinj, shpërblimet e dietat dhe telefonat (http://www.respublica.al/artikuj/2012/09/03/kursim-kursim-kudo-kursim ). Një regjim i tillë kursimi nga Departamenti i Buxhetit, do të ishte i kuptueshëm në rastin kur Departamenti i Thesarit do të raportonte se nuk janë arkëtuar të ardhurat e shtetit sipas parashikimit.

Por Departamenti i Thesarit raporton se arkëtimi i të ardhurave deri në fund të korrikut ishte në nivelin 190 miliardë lekë (http://www.minfin.gov.al/minfin/pub/printimi_7_3903_1.pdf ), ose 4% më i lartë se një vit më parë në vlerë nominale (http://www.minfin.gov.al/minfin/pub/korrik_2011_3015_1.pdf ). Ndërsa niveli i shpenzimeve, sipas Departamentit të Thesarit, ra me 1.2% krahasuar me një vit më parë. Ndërkohë, rritja e të ardhurave nominale për gjithë vitin 2012 është parashikuar të jete 3.4%.

Pra, përse qenka alarmuar Departamenti i Buxhetit dhe ka kërkuar të shtërngohet rripi nga 7 shtatori e tutje? 

Ose Departamenti i Thesarit na gënjen për arkëtimin e të ardhurave, ose Departamenti i Buxhetit po planifikon ta shtrëngojë rripin deri në fund të 2012-ës, për t’u bërë xhymert pastaj para zgjedhjeve të 2013-ës…

E.Zaloshnja