Opozita sqaron qëllimin e aksionit të vet, Basha: “Nuk kërkojmë zgjedhje, por vetëm largimin e Edi Ramës”

Kreu i Partisë Demokratike  Lulzim Basha ka sqaruar sot pozicionin e opozitës lidhur me kërkesën e saj të një dite më parë për dorëheqjen e kryeministrit. Deklarata vjen një ditë përpara protestës së paralajmëruar të PD-së, që merr shkas nga çështja e trafikut të drogës dhe rrëzimit të avionit në Divjakë. “Nuk kërkojmë zgjedhje, por kërkojmë largimin e atij që ka përgjegjësinë, Edi Ramës. Nuk kërkojmë një shumicë të re politike, por kërkojmë që kjo shumicë sot në parlament të reflektojë atë që ndjen shumica e çdo shqiptari sot, i djathtë dhe i majtë, përgjegjësi Edi Rama të shkojë në shtëpi”, deklaroi Basha. Në këtë kuptim, PD-ja e ka personalizuar akuzën e vet direkt te kryeministri, me çrast kërkon edhe të përqendrojë sulmin pikërisht ndaj tij. Dhe aksioni i saj me këtë lloj kërkese, ka brenda edhe intuitën për pakënaqësi brenda vetë PS-së për Edi Ramën. Basha e nënvizoi këtë edhe në deklaratën e djeshme, kur foli për të zhgënjyer. Këto elementë kanë rëndësinë e tyre, pasi është e qartë se aksioni opozitar paraqitet kompleks dhe synon të realizojë një shumatore forcash, të dukshme e të paduskhme kundër kryeministrit aktual.

s.z