Olldashi thyen një tabú: Sot në mbrëmje shkon në “Ilva Tare Tonight”

Sokol Olldashi do të jetë sot në mbrëmje tek Ilva Tare Tonight, në Ora News. Është një studio që është bojkotuar në vijimësi nga njerëzit e Berishës, përfshirë dhe Olldashin, por ky i fundit ka vendosur ta prishë këtë traditë e ta thyejë këtë tabú, ende të pashpjegueshme prej Ilvës vetë. Me këtë vizitë për herë të parë në dy vite e gjysmë të programit, kandidati për kreun e PD-së ka rast të demonstrojë dhe pakëz “individualitet” e “nerv rebeli” (sa pak lipset për të qenë rebel brenda PD-së).

Në fakt, gara mes tij e Bashës është në pikun e vet. Ata janë duke shkelur vetëm në terren, megjithatë, dhe janë duke dalë më pak në TV (duke përjashtuar raportimet mbi takimet e tyre). Moderatorët e programeve ‘talk show’ do donin t’i kishin, por ata nuk kanë shkuar. Sokol Olldashi ka qenë edhe tek Fevziu nja dy ditë pasi shpalli kandidaturën e vet, ndërsa Lulzim Basha nuk ka qenë në asnjë studio. Ndoshta vizitat për në studio TV i ka lënë për në fund.

Re.Pu.