Olldashi shtrëngon të përditshmen Shqip të dalë me një editorial të vetin; s’e ka bërë kurrë më parë

E përditshmja Shqip nuk e ka në stilin e vet publikimin e editorialeve, dmth e opinioneve që përfaqësojnë frymën e gazetës. Por sot kish dalë me një opinion të vetin të publikuar në mënyrë integrale në faqe të parë, në tërë lartësinë e kolonës së djathtë. Shkak është bërë ministri Olldashi, që e ka kataloguar Shqipin si gazetë “shumë të afërt me zotin Rama, për të mos thënë politikisht të kontrolluar prej tij” (në tentativën për t’u mbrojtur prej akuzës mbi financimin e paligjshëm të RD-së me mijra euro nga pozitat e ministrit).
Shkrimi është në stilin e në praktikën e editorialeve të shtypit shqiptar, dmth me nerv. Por autori është kujdesur që të jetë në kufijtë e korrektesës në komunikimin me një ministër të republikës. “Nëse je i pastër zoti ministër, shko në gjykatë dhe vërtetoje se transferta 500 mijë USD për Rilindjen Demokratike është e ligjshme dhe, të lutemi, mos na fyej duke bërë krahasime mes gazetës Shqip dhe trakteve që ekzistojnë vetëm për të mbajtur në punë militantë e për të krijuar numra NIPT-esh dhe numra llogarish që përpijnë qindra miliona lekë të paguara nga qytetarët e këtij vendi”, thuhet në një pasazh të këtij shkrimi. Dhe pak më poshtë, bëhet një shpjegim i linjës editoriale kritike me qeverinë e Olldashit: “Gazeta Shqip ka më pak se shtatë vjet që është themeluar. Fakti që gjatë gjithë ekzistencës së saj, kjo gazetë ka qenë kritike ndaj qeverisjes së partisë së z. Olldashi lidhet vetëm me faktin se gjatë gjithë kësaj kohe, vetëm partia e z. Olldashi ka qenë në qeveri.” E.G.

Editorialin e plotë mund të lexoni në linkun: http://gazeta- shqip.com/lajme/2012/10/04/zbutja-e-shpifjes-eshte-njesoj-e-turpshme/