Noka për fotot: Ne kemi qenë qeveri për popullin, nuk merreshim me luksin e ministrive

Ish-ministri i Brendshëm, Flamur Noka, reagon pas fotove të shpërndara në Facebook, ku shfaqet gjendja skandaloze e ambienteve të dikasterit që ai vetë ka drejtuar për disa muaj. Noka thotë në një intervistë për GSH:

“I kam parë fotot e publikuara së fundmi nga ana e kryeministrit të ri dhe i vetmi koment që unë kam lidhur me ato foto është se kjo është qeveri skutash. E cilësoj të tillë, pasi kjo qeveri ka ngatërruar arsyet se pse ka ardhur në pushtet. Kjo qeveri kujton se populli i ka zgjedhur për të bërë marangozin dhe bojaxhiun”, shprehet Flamur Noka.

Sipas tij, foto të tilla mund të bësh kudo në bodrumet e institucioneve. “Foto dhe pamje të tilla do ketë në çdo vend, nëse fotografohen bodrumet dhe skutat e institucioneve. Qeveria dhe kryeministri i ri paskan ardhur me të vetmin vizion, për të fotografuar çdo skutë dhe bodrum, ku patjetër që do ketë pamje të tilla. Unë di të them që këta kanë ardhur për të vjedhur popullin. Ne kemi qenë qeveri për popullin dhe nuk kemi zgjedhur luksin tonë, siç po bën kryeministri aktual”, – ka përfunduar reagimin e tij, ish-ministri i Brendshëm. a.n.