Një princ në Presidencë (në atë të Republikës)

E përditshmja "Shekulli" kishte bërë sot një vëzhgim në faqen e re online të Presidencës dhe ka konstatuar se në listën e këshilltarëve të Presidentit të ri (të Republikës) këshilltari i tij politik, Leka Zogu prezantohet zyrtarisht si "Princ Leka II".

Shkruan Shekulli: "… Edhe pse Shqipëria është një Republikë Parlamentare, presidenti i saj duket se nuk mendon kështu. Në faqen e Presidencës renditen CV-të e anëtarëve të stafit të ri dhe në rreshtat ku jepet biografia e shkurtër e Leka Zogut, ndryshe nga të tjerët ai cilësohet me titullin monarkist Princ: “Është lindur më 26 mars 1982 në Afrikën e Jugut, Johanesburg…Ka mbaruar studimet në Akademinë Ushtarake Mbretërore Sandhurst në Angli, në Londër… Ka punuar pranë Ministrisë së Jashtme si Këshilltar i Ministrit në vitin 2006- 2009…. Mandej ka punuar pranë Ministrisë së Brendshme si Këshilltar i Ministrit nga viti 2009 deri në vitin 2012…. Princ Leka II është nderuar me Urdhrin e Lartë “Santi Maurizio de Lazzaro”…" etj – janë disa nga fjalitë e CV-së.

Sipas Shekullit, nëse do të hulumtonit te faqja zyrtare e Oborrit Mbretëror Shqiptar, familja mbretërore vijon që të njohë pasaportat e mbretërisë dhe vulat e saj, ndonëse Kushtetuta shqiptare ka përcaktuar se në krye të shtetit është Presidenti. Interesante do jetë të  merrej ndonjë dëshmi e brendshme nga stafi: Si i drejtohet Presidenti (i Republikës) këshilltarit të tij Princ kur e thërret në zyrë ose në telefon? (A.N.)

Në foto: Leka Zogu, gjatë ceremonisë së dorëzimit të mandatit presidencial, Presidentit të ri, Bujar Nishani, në selinë e Presidencës. 24 Korrik 2012 – Foto LSA