Një në dy shqiptarë ndihet "100 përqind i pasigurtë"?

Në rreth 30 mijë dyqanet ushqimore dhe të fruta-perimeve, si dhe në furrat, që janë biznese të vogla në mbarë vendin, numri i personave që marrin me lista është katërfishuar vetëm në dy vitet e fundit. Ky është rezultati ende jo i bërë publik i një anketimi të kryer nga një OJF shqiptare e fushës.

Armatës së gjatë të pensionistëve, të papunëve dhe invalidëve u është shtuar numri i të papunëve të rinj, ose atyre që përfundimisht e kanë humbur çdo lloj shprese për t’u punësuar. Në listat e atyre që e marrin bukën, ushqimet e tjera dhe frutat veresie janë edhe qindra e mijëra familje shqiptare që kanë të punësuar në rradhët e tyre, por që shtrenjtimi i shumë produkteve ua ka bërë të pamundur përballimin e jetesës me të ardhurat normale që marrin çdo muaj. Studimi i OJF përfundon se gjatë katër viteve të krizës 2008-2012 një në çdo dy shqiptarë ndihet 100 përqind i pasigurtë për fatin e të ardhurave të tij dhe të sigurimit të jetesës për vete dhe familjen.

Një konfirmim të tërthortë të këtij shqetësimi dhe pesimizmi të thellë e jep edhe vrojtimi i fundit i Bankës së Shqipërisë, bankës sonë qendrore. Kosto e jetesës për konsumatorët është rritur në tremujorin e fundit të vitit 2012, në krahasim me tremujorët e mëparshëm. Banka e Shqipërisë anketon periodikisht konsumatorët dhe bizneset mbi pritshmëritë e tyre. Dhe vlerësimi i fundit i konsumatorëve për situatën e familjeve dhe situatën ekonomike në tërësi gjatë tremujorit të katërt 2012 ishte me rënie. Problem themelor mbetet papunësia, e cila, sipas tyre, për gjashtë muajt e parë të këtij viti(2013) do të rritet edhe më shumë. Bazuar në këto shqetësime, besimi i konsumatorëve për ekonominë e vendit dhe vetë gjendjen e tyre qëndron aktualisht 4.1 për qind poshtë mesatares afatgjatë.

Në të njëjtën situatë pesimizmi dhe mungese perspektive si individët ndodhet edhe biznesi, përfaqësues të të cilit kanë pohuar për Bankën e Shqipërisë se pritjet për ecurinë e ekonomisë janë shumë më të ulëta se normalja. E.Shehu