Një kritikë e Edison Ypit për librin e fundit të Mira Meksit. Edhe sulme, por edhe disa mendime që duhen marrë në konsideratë

Edison Ypi shkruan sot te “Mapo” për romanin e fundit të Mira Meksit, “Mallkimi i priftëreshave ilire”. Ypi njihet për stilin e vet goditës, për qasjen direkte ndaj temës për të cilën shkruan dhe që shpesh e kalon në zbërthim asgjësues të tjetrit, të cilin e përshkruan ashtu siç e percepton. Pa hequr dorë nga sulmet personale. Mirëpo në rastin e Meksit, Ypi është marrë me atë çfarë ajo ka shkruar në parathënien e veprës,  pra i ka qëndruar disi larg personalizimit. Dhe ka sjellë një kritikë sërish asgjësuese, por duke kapur disa pohime që janë historikisht të diskutueshme, të tilla meqë janë në parathënie, pra jo tril letrar. P.sh “mbretëresha Teutë…me bëmat e saj…(bëri të mundur) hapjen e një faqeje të re ne historinë e botës; perëndimin e Greqisë dhe daljen në skenë të Romës”, citon Ypi, Meksin. Ky është një pohim kaq i diskutueshëm historikisht, saqë e vë në diskutim edhe vetë kapacitetin e shkrimtares për t’iu qasur një pune të tillë. Ypi vetë nuk mungon të fshikullojë: “Për të qeshur sa duhet me këto budallallëqe duhen kushte. Shëndet së pari, që të mos ndali zemra dhe të mos shpërthejë gjaku nga brimat e veshëve. Të jesh në qejf se i ke punët në vijë. Ta kesh rrogën të paktën nja 5 mijë Euro në muaj. Unë nuk plotësoj asnjë nga këto kushte, prandaj nuk po qesh aspak por po vazhdoj leximin e auto-parathënies”, shkruan Ypi. Më tej një pohim po kaq i guximshëm: “Ideali i Teutës për të pushtuar Greqinë, vendin e saj shpirtëror për të krijuar mbretërinë iliro-greke….”, sjell një tjetër bubullimë nga Ypi. Është folur shpesh që kritika i mungon letërsisë shqipe dhe me këtë argument, “sulmi” i Ypit, ka kuptim dhe vlerë se ofron një mendim publik për një vepër që ka patur jehonë jo të vogël. Dhe jemi koshientë se shpesh promovimi i veprës çon në renditje imagjinare vlerash letrare, pikërisht se mungon ajo kritikë që do të filtronte si duhet botimet, por edhe çmimet. Kjo natyrisht nuk i heq asgjë veprës së Mira Meksit, e cila sfidën e vërtetë e ka me lexuesit.

http://mapo.al/2014/11/04/llallallaja-e-mira-meksit/

s.z