Një foto e Sekuit, një aksion i stafit të Arvizusë... Mos ka një thyerje në raportet e Bashës me ndërkombëtarët?

E përditshmja “Panorama” shkruante sot se, sipas burimeve të saj, kreu i Policisë Bashkiake, Florenc Hoxha ishte shkarkuar nga detyra dhe është zëvendësuar me Vullnet Topallin. Fjalët për shkarkimin e Hoxhës qarkulluan dje pasdite në mediat e Tiranës bashkë me raportimet mbi një konflikt të Hoxhës me n/komisionerët e Avokatit të Popullit dhe me një deklaratë shumë të ashpër të Amnesty International ndaj Bashkisë së Tiranës. Në qendër është historia e dhunimit të romëve nga policia bashkiake.
Por numri një i bashkisë së kryeqytetit u shfaq sot në publik krah personit që akuzohej direkt për ushtrimin e kësaj dhune, Hoxhës. Basha dhe Hoxha sot ishin të dy bashkë sot gjatë inspektimeve që kryebashkiaku u bëri punimeve në rrethrrotullimin e Doganës I pyetur nga TV A1Report, kryebashkiaku Basha e hodhi poshtë lajmin e shkarkimit të Hoxhës me fjalët: “Nuk merremi me spekulime, jemi këtu vetëm për lajme të vërteta”.
Deri këtu, ok, por dy lajme të ditës së sotme, që kanë të bëjnë me Ambasadën e BE dhe Ambasadën e SHBA në Tiranë duken vërtet interesante. Shqiptarja.com ka botuar një foto jo të zakontë. Ambasadorin e BE-së në Tiranë Ettore Sequi duke përqafuar një... fëmijë rom në rrugët e Tiranës. “Bashkia i rreh, Sequi i përqafon” – titullon lajmin gazeta.
Dhe po sot media raporton se “stafi i Ambasadës Amerikane në Tiranë do të mbledhë vetë shishe plastike të përdorura, si kontribut për një mjedis unik dhe projektin mbi planifikimin urban”.
Mbledhja e shisheve plastike dhe kanaçeve, në fakt, është një aktivitet në të cilin angazhohet komuniteti rom në vend, pikërisht, aktiviteti për të cilin ata së fundmi janë bërë pre e Bashkiakëve të Tiranës. (A.N.)