Një dokumentar i mirë i R. Qafokut promovohet në stilin ‘Fevziu’: mes politikanëve

Kush ka shkuar mbrëmë në premierën e dokumentarit të Roland Qafokut me idenë për të bërë një qokë kolegësh, me siguri është befasuar. Dokumentari me titull “Ismail Qemali që nuk kemi njohur” ishte më i arrirë se sa pritej. Shfaqja zgjati më shumë se një orë, dhe shikuesit që mbushën sallën Black Box e ndoqën pa përjashtim deri në fund. Kish në të dy interpretime provokative lidhur me vdekjen e Ismail bej Vlorës (“është helmuar nga njerëzit e Esad Toptanit”, thuhej nga historianët e intervistuar e në dokumentat e përmendur prej Qafokut), dhe lidhur me datëlindjen (“Ismail Qemali ka lindur më 16 tetor, gjë që u fsheh gjatë regjimit komunist me synimin për ta lënë këtë datë me vetëm një kuptim”, ishte pretendimi i dokumentarit). Bëhet fjalë për spekullime? Nuk është çudi. Shpesh, spekullimin nga e vërteta e ndan vetëm një fije në historiografi. Por provokacioni mund të jetë i vlefshëm për t’i cytur të tjerët të bëjnë saktësimet e duhura.

Premiera ishte e organizuar në stilin “Fevziu”, dmth ishin ftuar shumë politikanë e funksionarë shtetërorë (mes të cilëve binte në sy Topalli e Basha), dhe pak gazetarë. Është një modë që po ndiqet nga shumë gazetarë e publicistë kohët e fundit. Edhe gazetari tjetër Ilir Ikonomi, që ka shkruar një libër të mirë mbi Ismail Qemalin, e mbi udhëtimin e tij drejt Vlorës 100 vjet më parë, nuk i rezistoi dot tundimit për të patur në veprimtarinë promovuese udhëheqësit politikë të vendit.

Re.Pu.