Një demokrat lexon 'listën e bllokmenëve të dëmshpërblyer nga Majko'. Majko i kthen reston në FB

Po të lexosh shtypin e ditës, është e dukshme kakofonia politike rreth kërkesave të ish-të përndjekurve në grevë urie. Gjen batuta e deklarata pa fund, por e vështirë të gjesh saktesisht edhe pas 28 ditesh: çfarë kërkojnë grevistët konkretisht dhe cilat janë ministritë përkatëse, përgjegjëse për t'u dhënë përgjigje. Ndoshta, prandaj deputetit demokrat Gent Strazimiri, i ka shkuar mendja se përgjigja që kërkon grupi i njerëzve në grevë urie është publikimi i listës së bllokmenëve të dëmshpërblyer për burgun pas viteve '90. Dhe këtë ka bërë dje ne Kuvend:

“Opozita e sotme u dha pafajësinë me vendim gjyqi të gjithë kanibalëve që dënuan pa faj dhe zhdukën me mijëra shqiptarë, dhe në një kohë rekord i dëmshpërbleu me para në dorë si më poshtë vijon…” - tha deputeti dhe më pas renditi emrat Lenka Çuko,  Arianit Çela, Ramiz Alia, Rrapi Mino, Prokop Mura,  Simon Stefani, Qirjako Mihali, Rita Marko, Zylyftar Ramizi, të dëmshpërblyer sipas një liste që lexohet në disa nga gazetat e sotme, nga 1 milion lekë (Rita Marko) deri në 9 milion lekë (Prokop Mura), përgjatë viteve 99-2001

"Të gjithë janë dëmshpërblyer në kohën ku kryeministër ishte një eksponent i PS, i cili sot bën thirrje për humanizëm, shkon dhe i takon, - tha demokrati Strazimiri. E ka fjalën për Majkon. Ky i fundit ka reaguar në profilin e tij në Facebook:

“Për fatin e keq të PD-së, dikush ka ngatërruar adresë. Nuk ka akte qeveritare me të tilla data nga qeveria që kam drejtuar unë. Bllofe të tilla të turpshme janë pjesë e lojës politike të ditës. Po të ishte siç thotë PD-ja, aktet e mësipërme do të ishin publikuar si vendime në Fletoren Zyrtare. Pagesat në fjalë kryhen nga organi i prokurorisë për zbatimin e vendimeve të gjykatës gjatë vitit 1997 dhe nuk “mbulohen” nga veprimtaria e qeverisë e kujtdo viti tjetër. Ajo që mbetet është gjuha e urrejtjes karshi njerëzve që kërkojnë të drejtën që u jep ligji..." (A.N.)

Foto LSA: Ushtare duke mbajtur arkivolin me trupin e pajete te Ramiz Alisë, ish-udheheqesi i fundit i regjimit komunist dhe ish-Presidenti i pare pluralist pas viteve ‘90, që u nda nga jeta ne 7 Tetor 2011 ne moshen 86 vjeçare.