Një bisedë e Berishës me Mustafa Nanon, dy ditë para riardhjes në pushtet

Berisha e dinte që komunizmi do binte? Të paktën kjo është përshtypja që krijohet nëse kihet parasysh ajo që ai ka dashur të diktojë si profil publik i futur në skenë pas lëvizjeve studentore të dhjetorit. Por në fakt Berisha nuk e besonte kurrë që komunizmi do binte. E thotë ai vetë në një bisedë që e përditshmja DITA e ka nxjerrë nga pluhuri i arkivave dhe e ka botuar në numrin e sotëm. Biseda është e rrallë për dy arsye: e para sepse është e para dhe e fundit intervistë që i është dhënë Mustafa Nanos dhe e dyta sepse në të (me siguri për shkak të pyetjeve provokuese) Berisha ka dalë goxha nga formati i tij i zakonshëm populist.

Në një hyrje të intervistës botuar sot në DITA, Mustafa Nano i thotë gazetarit Adrian Thano që kjo bisedë është bërë në 2005 dy ditë para zgjedhjeve që risollën Berishën në pushtet. "Të gjithë më thoshin nuk ta jep intervistën kurrë ai ty, por një ndërhyrje e Mero Bazes bëri që Berisha të pranonte për 10 minuta - tregon Nano.

Pyetjet janë kërkuar paraprakisht dhe më pas biseda është zhvilluar në zyrën e Berishës në PD. Eshtë transmetuar vetëm një herë në një TV të sapohapur dhe me audiencë të ulët që më vonë u mbyll. Ja disa nga pyetje përgjigjet marrë nga numri i sotëm i së përditshmes DITA:

Ka ndonjë moment nga jeta juaj, që ju është gdhendur në kujtesë e nuk ju shqitet?
Ka disa gjëra nga jeta ime. Një moment është kur unë kam bindur familjen time t’i kundërvihem dikataturës. Ka qenë një proces i gjatë dhe i vështirë. Momenti i dytë është kur kam parë gjëra të pabesueshme, siç ishte rënia e diktaturës. Nuk e prisja kurrë që unë do ta shihja këtë proces, kjo është e vërteta. Kisha një ide që do të mbështeshemim si Kuba, sepse kjo ide qarkullonte mjaft në atë kohë. Ka disa momente të tilla, jeta ime ka qenë jetë me momente
E qortoni apo e kuptoni Ahmet Zogun në ujdinë që bëri  për të riardhur në pushtet?
Nuk do të bëja kurrë një ujdi të tillë. Nuk do të vija në pushtet me ndihmën e të huajve. Aq më pak fqinjëve të huaj që kishin interesa të qarta mbi Shqipërinë.
Duhet bërë referendum mbi rivendosjen e monarkisë në Shqipëri?
Mendoj se një referendum u bë.
Më thoni ju lutem tre politikanët shqiptarë më të këqij të shekullit XX!
Enver Hoxha, Ramiz Alia, Fatos Nano. (Ne.Su)
 

Nano-Berisha, e plotë:

http://gazetadita.al/intervista-e-pabotuar-nano-berisha-dy-d...