Nishani sulmon Ramën në forumin e Alpbach-ut: Qeveria ka mungesë tolerance e konsensusi

Me një gjuhë aspak “presidenciale” ka folur kreu i shtetit Bujar Nishani në Forumin Europian Alpbach të mbajtur në Austri, duke i kushtuar një vëmendje të veçantë përplasjeve më të fundit të qeverisë me presidencën. Nishani i quajti këto përplasje “rrjedhoja të një mentaliteti të shkuar, të karakterizuar nga mungesa e tolerancës dhe e konsensusit dhe e premtimeve të ndryshme në opozitë nga ato faktet në qeverisje”. Sipas Nishani, ndryshimi i mentalitetit është sfida më e vështirë e shoqërisë shqiptare dhe e shoqërive pastotalitare në përgjithësi. “Mungesa e tolerancës dhe konsensusit dhe qëndrimi i dyfishtë me kërkesa për standarde të larta demokratike në opozitë dhe qëndrimet autoritare në pozitë, qëndrimi në pritje në vend të marrjes së nismave janë shfaqje e mentalitetit të shkuar, të cilat ngadalësojnë procesin e zhvillimit të demokracisë dhe të reformave”. Ka reaguar pas kësaj fjale deputeti socialist Erion Braçe në rrjetin fb. “Turp e faqja e zezë! – shkruan Braçe – Nishani është i pari President në 23 vjet, që sulmon Qeverinë e vendit të tij jashtë vendit!”.

a.k