Ne i mbrojmë nacionalistët grekë nga vezët me RENEA-n... policia greke nuk u siguron dot as jetën kuqezinjve në Athinë!

Lajmi që partia neonaziste greke nuk lejon themelimin e degës së Aleancës Kuqezi në Athinë, nuk habit shumë, sepse ajo parti njihet tashmë për mënyrën raciste sesi po ngre kapitalin politik mbi momentin e frustrimit financiar të popullit grek. Gjëja që të habit është që policia greke nuk garanton sigurinë e aktivitetit dhe me këtë e ka motivuar mosdhënien e lejes.

Nga ana tjetër, para pak ditësh, gjatë kremtimin e festës së çlirimit të Greqisë (që për habi, u mbajtën në Shqipëri) ishin me qindra njësi të patrullave të përgjithshmë të policisë, forcave të ndërhyrjes së shpejtë dhe ato RENEA që shoqëruan hap pas hapi dhe kilometër për kilometër shtetasit grekё, zyrtarët grekё, madje dhe përfaqësuesit e “Agimit të Artë”, për t’u garantuar sigurinë.

Përveç lejes së mohuar AK-së, të premten, katër deputetë të partisë naziste greke “Agimi i Artë” kanë shkuar në shtëpitë e disa aktivistëve të Aleancës KuqeZi duke kërcënuar familjet dhe fëmijët e tyre në rast së do të vendosnin mbajtjen e aktivitetit të planifikuar. Grupime të partisë “Agimi i Artë” prej disa ditësh janë zhvendosur në hotelin ku do të mbahej aktiviteti duke ushtruar presion të jashtëzakonshëm mbi përfaqësuesit e AK si dhe kanë vendosur në ambientet e jashtmë të Hotelit një parrullë ku shkruhet: “Poshtë fashistët kuqezi shqiptarё”, duke mos kursyer as dhe pronarët e Hotelit Stanley që ndodhet në qendër të Athinës e duke i detyruar ata të anullojnë kontratën për zhvillimin e aktivitetit, njofton në një komunikim për mediat AK.

A thua policia shqiptare është më e zonja sesa ajo greke për të ruajtur rendin e sigurinë e aktiviteteve? Apo, qeveria greke thjesht nuk ka frikë të tregojë se është “e pandjeshme”? ne.su.