Ndarja territoriale, Himara do të kalojë njësi më vete, si shumicë etnike

Himara do të mbetet zonë më vete territoriale, por në administrimin e saj do të jenë dhe Vranishti, Kurveleshi dhe Lukova. Ky është propozimi që vjen për këtë zonë në procesin e reformës administrative territoriale. Nga deputetët është kërkuar që të respektohet si historia e zonës, duke iu referuar qëndrimit gjatë periudhës osmane, ashtu dhe lidhjes territoriale.

Krijimi i një Himare si zonë me shumicë etnike minoritare greke ka sjellë ndryshimin e variantit të kalimit me 39 bashki të Shqipërisë. Ky është një variant i cili ka gjetur mbështetjen e deputetëve të PS dhe LSI. Ministri Çuçi ka thënë se nuk ka asnjë rrezik nga krijimi i një zone me etni të pastër, duke qenë se aktualisht janë tetë komuna të tilla. Sipas ministrit propozimi për grupimin e komunave etnike grekë është konform konventave ndërkombëtare.

Për ministrin Çuçi frika për krijimin e një kërkese për autonomi nuk qëndrojnë pasi prej shumë vitesh komuna të tilla ekzistojnë. Deputetët kanë kërkuar dhe eliminimin e një përplasjeje mes mendimeve ekstremiste greke dhe stabilitetit të zonës, referuar qëndrimeve të “Agimit të Artë”. Propozimi për krijimin e një komune të tillë do të kalojë më parë në diskutim me banorët e zonës si dhe me të zgjedhurit vendor, për të arritur më pas në një draft konkret. S.S