Ndahet papritur nga jeta Betim Muço; Do të varroset, sipas dëshirës së tij, në SHBA

Dje në mëngjes është ndarë nga jeta në moshën 68 vjeçare Betim Muço, poet, tregimtar, përkthyes (kanë tërhequr vëmendjen përkthimet e James Joyce-it e të Nabokovit) dhe autor tekstesh të këngëve të shumta. Vdekja ka qenë e papritur. Kish ca kohë që ndjente shqetësime në zemër, por ai vetë dhe të afërmit i kishin injoruar me idenë se nuk bëhej fjalë për ndonjë gjë kushedi se çfarë. Mirëpo dje në mëngjes, teksa kanë dashur ta zgjojnë nga gjumi, familjarët e tij e kanë gjetur pa jetë në shtëpinë e tij në Maryland, SHBA, ku jetonte prej më shumë se dhjetë vitesh, tok me të shoqen Martën, eksperten e Bankës Botërore që pa dëshirën e saj u bë lajm për ca kohë këtyre anëve (dikush e kish menduar si kandidate për postin e guvernatorit të Bankës së Shqipërisë), dhe me fëmijët, një djalë e dy vajza. Dhe vetë Betimi ka punuar në Amerikë si sizmolog (ai ishte doktor profesor në Sizmologji) deri para pak muajsh, kur doli në pension.

Ai ishte një ndjekës i vëmendshëm i zhvillimeve në Shqipëri. Vinte herë pas here në Tiranë për të kaluar kohë mes miqve, por mbi të gjitha për të publikuar ndonjë libër të vetin (ja një poezi që ia ka kushtuar Tiranës, në vitin 199: E dua këtë qytet/Ku jam lindur e rritur/Dhe me ujrat e Lanës si fëmijë/Jam stërpikur/Ku kam ardhur e ikur/Ardhur e ikur.../Ja njoh erën e luleve/Dhe erën e plehrave/Dhe kthjelltësinë e qiejve./Qyteti ku mitet/Lindin e vdesin në shesh/Që gdhihet musliman/E ngryset i krishterë/Pervers e i ndershëm/I frikur e rebel./Ku lajmet e botës merren vesh më shpejt/Se kobi i shtëpisë tënde/Që në kafene të vjen./E dua, s'e dua/E bëj dhe e shbëj/E shaj, e pështyj/Në pasion bisedash/Në terr të padritës/A në gërvimat e çezmave/Mes llucrash e këllirash/Dhe buburrecat njerëz./Më merr malli për të/Dhe në mes të Nju Jorkut/Një mall i çuditshëm/Përmbi rrokaqiellat./Me ç'mallkim dashurie/Qënkam lidhur kaq fort/Që rrekem t'i iki/E s'ikërkam dot.)

Pavarësisht kësaj, burime që janë të afërt me familjarët e tij thonë se ka qenë dëshirë e tij që, kur t’i vinte hera e vdekjes, të varrosej në SHBA.

Re.Pu.