A mund t’i kthehet opozita bojktotit?

Seanca e sotme parlamentare është mbyllur pas debateve të shumta, akuzave për çdo gjë të mundshme, për video dhe shantazhe. Megjithatë seanca u mbyll pa u votuar mocioni të cilin PD-ja e kishte depozituar për shkarkimin e kreut të Kuvendit, Ilir Meta. Në këtë kuadër, opozita nuk mori rezultatin e synuar nga një çështje që synonte ta kthente në kauzë, megjithë paqartësitë që ekzistojnë. Këmbëngulja për dorëheqjen e Metës, mund të nxisë mendimin se opozita do t’i kthehet bojkotit, sërish me kauzën e dekriminalizimit. Mirëpo nëse i referohemi qëndrimit të parë të ambasadës amerikane, përjashtimi i deputetit Doshi, shkon në këtë linjë, kështu që ritematizimi i kësaj çështjeje do të dukej artificial. Aq më tepër që në këtë rast kërkesa paralelizon një hetim penal. Në çdo rast, situata e tanishme identifikoi shumë përgjegjësi të politikës, që vepron me mekanizma parainstitucionalë, por përderisa të dyja palët flasin gjerë e gjatë për njëra-tjetrën me terma kriminalizues, është shumë e pabesueshme që njëra prej tyre të ketë monopolin e së vërtetës, apo qoftë edhe ndonjë epërsi morale.
s.z