Ministri i Financave: “Nuk e kam ditur që të ardhurat 2009-2013, ishin baraz ose në rënie”. Si u bënë premtimet atëherë?

Shkëlqim Cani, që është ministër i Financave i Republikës së Shqipërisë, ka qenë sot i ftuar në “Top-Story”. Ai ka folur për paketën fiskale për buxhetin e ri  dhe objektivat e qeverisë. Duke diskutuar me Ardian Civicin, Cani ka bërë edhe këtë deklarim: “Ju keni qenë në Bankën e Shqipërisë dhe ndoshta i keni parë të dhënat për të ardhurat, por unë personalisht, për shkak të propagandës së qeverisë së shkuar, për katër vitet e fundit të saj, nuk e kam ditur që të ardhurat nga viti në vit, ose ishin baraz, ose shkonin me ulje”. Deklarimi ka rëndësi. Së pari, sepse ai dëshmon sinqeritetin e ministrit, që nuk është pak. Së dyti, në planin politik, ky deklarim na thotë pak a shumë se “edhe ne si opozitë na gënjeu Saliu”. Dhe që këtej, pa ekzagjeruar aspak, as me ndonjë tendencë, mund të nxjerrim përfundimin, se brenda premtimeve të PS-së në fushatë, ka dorë edhe gënjeshtra e z. Berisha. Çfarë do të thotë më tej se ekipi opozitar që sot qeveris, për shumëçka, mundet të mos ia ketë patur idenë se çfarë bëhej. Energjia është një pikë e mundshme në këtë drejtim, nisur nga premtimet e bujshme. Dhe janë premtimet që lëshohen në erë, ballfaquar edhe me këtë që na thotë ministri, që na konfirmon se ajo që thuhet në fushatë, nuk do dëgjuar.

s.z