Ministri Çuçi: “70% e komunave nuk kanë bërë asnjë auditim në 20 vjet”. Zëdhënësi i KLSH-së: “Vetëm në tre vjet janë me dhjetëra”

Ministri i Pushtetit Vendor, Bledi Çuçi, ka qenë sot në Komisionin Parlamentar të Ligjeve ku ka folur për detyrat që i dalin kësaj ministrie në kuptim të konstatimeve të Progres-Raportit. Dhe në këtë seancë ministri ka bërë një deklaratë që nuk është thënë më parë. “Javës tjetër një nga firmat audituese më të njohura në botë do të kontraktohet për këtë qëllim, që ne të bëjmë një vlerësim financiar të inventarëve, aseteve, borxheve, çdo gjë që kanë njësitë aktuale, dhe këtu dua t’u them një informacion të vogël. Janë rreth 70 përqind të komunave që në 20 vjet nuk kanë bërë asnjë auditim. Kjo gjë është katastrofike", tha Bledi Çuci(http://news.albanianscreen.tv/pages/news_detail/84432/ALB). Mirëpo ky informacioni i vogël bie parimisht ndesh me detyrimet që burojnë nga ligji organik dhe detyrat funksionale të Kontrollit të Lartë të Shtetit, i cili ka si angazhim kryesor auditimin financiar të çdo njësie shtetërore si dhe të atyre subjekteve private që kryejnë investime me pjesëmarrje deri në 50% të parave publike. Në këtë kuptim KLSH-ja ka kontrolluar përdorimin e fondeve buxhetore të çdo njësie vendore dhe e ka bërë këtë në mënyrë vjetore. I kontaktuar nga “ResPublica”, zëdhënësi i KLSH-së, Bedri Coku, deklaroi se “të paktën në tre vjet që kam unë në detyrë, janë me dhjëtarë raportimet zyrtare dhe propozimet për marrje masash, që ne si KLSH kemi bërë për njësi të ndryshem vendore, apo drejtues të tyre. Ne ballafaqohemi po të dojë ministri”, tha Coku, që ka shtuar se “në këtë rast ministri ia ka futur kot”. Tani  nuk dihet se për çfarë e ka patur fjalën tamam ministri, pasi edhe për asetet, do të mjaftonte rakordim i informacioneve mes ministrive të linjës dhe do të rezultonte sesi është gjendja, pa patur nevojë për një firmë nga më të mirat në botë.

s.z