Meqë është status me kushte, a mund të anulohet? - Dhe një përgjigje e shmangur për 21 janarin

Një nga anëtarët e delegacionit të PE-së për Europën Juglindore, Bernd Posselt ka komentuar në një intervistë për Deutsche Wellen përmbajtjen e progres-raportit të Komisionit Europian për Shqipërinë. Meqë është status me kushte a mund të anulohet - është njëra nga pyetjet që i bëhen europarlamentarit dhe ai përgjigjet ndër të tjera:

"... Unë nuk pres ndonjë kthim mbrapa, por nga ana formale këtë duhet ta vendosë Këshilli i BE-së, fillimisht ky është një rekomandim për Këshillin. Por Parlamenti Europian është pro, Komisioni po ashtu, tani pritet vetëm Këshilli i BE-së, aty mundet që edhe një vend i vetëm të bllokojë statusin, por unë nuk shpresoj të ndodhë kështu".
Më pas zotit Posselt (në foto) i bëhen dy pyetje interesante, njëra prej të cilave ka të bëjë me 21 janarin, ku europarlamentari nuk jep përgjigje të drejtpërdrejtë por le të kuptohet që raporti i PE mund të ketë "prioritete të tjera" nga raporti i djeshëm i prezantuar nga Fule. Më poshtë, pjesë nga përgjigjet e tij:
DW: Shqipëria duhet të përfundojë reforma të rëndësishme... Sa kohë i jep BE Shqipërisë për këtë?
Bernd Posselt: Anëtarësimi është një proces, i cili zgjat shumë kohë. Shikoni Kroacinë... Iu deshën më shumë se 10 vjet dhe gjërat ende nuk janë përkryer. Fillimisht Shqipëria duhet të vazhdojë kursin e reformave, dhe unë shpresoj që ose në dhjetor, ose në pranverë, unë shpresoj në dhjetor, Këshilli i BE-së të japë përfundimisht dritën e gjelbër për Shqipërinë.
DW: Në progres-raport kërkohet nga drejtësia shqiptare zbardhja e paanshme e ngjarjeve të 21 janarit. Pse e thekson KE pikërisht këtë?
Bernd Posselt: Një raport i tillë voluminoz përbëhet nga shumë nënrubrika. Ne si Parlament do ta marrim atë në shqyrtim. Parlamenti tani e ka raportin në dorë. Pas kësaj, ne vetë do të përpilojmë një raport politik. Kjo do të thotë që në muajt e ardhshëm ne si Parlament Europian do të kemi raportin tonë, që bazohet në atë të Komisionit, por ne do të japim opinionin tonë, se cilat pika janë për prioritare dhe cilat jo. Nuk mund ta them tani se cilat pika duhet të jenë prioritare në këtë raport. - A.N.

Intervista e plotë:

http://www.dw.de/dw/article/0,,16297014,00.html