Meksi, Majko e Fino bojkotojnë një ceremoni të Topallit

Kryetarja e Kuvendit, Jozefina Topalli ka drejtuar sot një pritje në të cilën u ka dhuruar aktet e themelimit të shtetit shqiptar ish-kryeministrave të vendit dhe të afërmve të Azem Hajdarit, Ibrahim Rugovës, Adem Jasharit e Pjetër Arbnorit. Në listën e të ftuarve ishin 6 ish-kryeministra socialistë, mes të cilëve edhe Fatos Nano. Mediave nuk u ka shpëtuar ironia e bashkëftesave Nano e Hajdari (të parin Berisha e PD e kanë akuzuar si vrasës të të dytit).

Topalli kishte ftuar Ylli Bufin, Vilson Ahmetajn, Bashkim Finon, Pandeli Majkon, Ilir Metën, Fatos Nanon dhe ish- kryeministrin demokrat, Aleksandër Meksi.

Ceremoninë e kanë bojkotuar Pandeli Majko, Aleksandër Meksi dhe Bashkim Fino. Kryetarja e Kuvendit tha se Meksit do ia çojë aktet e themelimit në shtëpi, kurse për dy të tjerët deklaroi se do ua çojë në zyrën e grupit.

Topalli:  “Sot, këtu, për të kremtu jubileun tonë nderojmë ish kryeministrat e vendit tonë gjatë këtyre 20 viteve në Shqipëri. Sot përkulemi me nderim për heronjtë e Kosovës, për Gandin e Ballkanit Ibrahim Rugova e për luftëtarin legjendar Adem Jashari. Sot kujtojmë e nderojmë Mandelën Shqiptare Pjetër Abnorin dhe liderin e lëvizjes studentore Azem Hajdari”. Re.Pu.