Më në fund, Imami shfaq gjysmë gatishmërie për kontrollin parlamentar

Akuzat e opozitës në adresë të Imamit ngjajnë të jenë të natyrës fantazmagorike (“aparatura për të përgjuar kundërshtarët, deri dhe ambasadorët”), por heshtja e tij, refuzimi i kontrollit të deputetëve dhe praktika e kontrollit të plotë të institucioneve nga ana e kreut të ekzekutivit, kanë bërë që këto akuza të ngjisin tek-tuk. Sot Imami ka mbajtur një qëndrim shpjegues, me anë të të cilit ka davaritur në një farë mase dyshimet. “Duhet të duhet të ngrihet një komision me njerëz të besuar që të betohen për sekretin dhe të dalin me deklaratë të përbashkët. Të ngrihet komision, drafti është gati dhe [do] të vërtetohet që ne nuk punojmë në këtë drejtim, punojmë kundër terrorizmit. Sa i takon provokimeve se janë përgjuar edhe diplomat, kjo nuk shkon, nuk jemi në kohën e Traktatit të Varshavës; por edhe kjo tullumbace e dytë do të plasë”, ka thënë ai, sipas Ora News-it.

Ai u shfaq i sigurtë edhe teksa ish duke folur për akuzën tjetër, atë të shitjes së armëve: “Unë zbatoj ligjin, raportoj për çdo shitje armatimi tek kryeparlamentarja, tek kryeministri dhe presidenti i republikës.” Edhe te Presidenti? Si zor të besohet që Imami, apo dikush tjetër në emër të tij, të ketë shkelur në presidencë gjatë muajve të fundit.

Re.Pu.